Awe diabierna anochi ta tuma luga Eleccion di Reina y Eleccion di Señora Carnaval pa nos Carnaval 64. E evento ta tuma luga den Aruba Entertainment Center situa na Dakota, cuminsando for di 7:00pm. Entrada ta 15 florin pa persona.
Fundacion Lotto pa Deporte, siendo propietario di e facilidad ta orguyoso di e eventonan aki. E aña aki a huur SMAC e luga pa no menos cu 5 diferente evento carnavalesco.
Aruba Entertainment Center
A inaugura Aruba Entertainment Center, situa den Avenida Milio J. Croes na aña 1993, pues e aña aki ta celebra 25 aña di existencia. E ta construi riba un tereno di no menos di 5.277 m2, cu ta inclui oficinanan bou tera, escenario, bañonan, oficina pa bende ticket, cashi di coriente y e tereno pa publico atende eventonan eyden.
Lotto pa Deporte
Fundacion Lotto pa Deporte ta existi desde aña 1982, pues ta activo pa 35 aña caba den nos comunidad, aportando directamente na deporte. Benta di e loteria e ultimo añanan ta subiendo, danki na e sosten grandi den comunidad. Na aña 2013 a surpasa 41 miyon florin. A nota un aumento barbaro na 2014 alcansando mas di 49 miyon florin. Na aña 2015 e benta a cay un poco na 48 miyon, a cay na 2016 na 47 miyon, pero a bons bek duro na 2017 ora cu a alcansa e suma di Afl. 50.478.681,= na benta total, cu ta representa un crecemento di 6.6% compara cu e aña anterior.
Bon partner di e rebendedonan
Lotto di Aruba ta conta cu mas di 180 rebendedonan, situa strategicamente tur rond di nos isla. Lotto anualmente ta paga mas o menos 5 miyon florin na comision na rebendedonan, pues ta mira den cada un di nan un bon partner di negoshi.
Aporte na economia
Separa di e mas di 110 miyon florin paga na premio e ultimo 5 añanan, Lotto ta paga comision na rebendedonan y sin lubida BBO na Servicio di Impuesto. Tur esaki ta afecta nos economia den forma positivo. Fundacion Lotto pa Deporte ta orguyoso cu, hunto cu e compania operado CBNA di Aruba, ta emplea casi 30 trahado, di cual tur ta Arubiano. Di e forma aki e fundacion ta aporta grandemente na nos economia y ta sostene nos hendenan.
