Marco Capitulo 11 vers 22 -23 ta mustra nos pa papia Fe, e ta mustra nos pa kere den Dios, e ta mustra nos pa haci oracion. Pasobra esaki ta e unico forma pa nos por mira cambio den nos bida, nos cas y nos Famia.
Si nos ta papia flohera, nos lo produci flohera, si nos ta papia trabao, trabao lo bini, vision lo bini y proposito lo tuma luga.
Pasobra locual bo ta papia y e forma cu bo ta papia ta masha importante pa bo bida Spiritual y material.
Hopi hende kier logra hopi cos pero nan forma di expresa nan mes ta causa stress pa nan mes. Por ehempel cuminsa declara cu bo salario no ta yega prome cu bo cobra.
Pensa riba divorcio mientras cu bo tin plan pa casa. Papia malo di bo propio di bo propio yiu, sabiendo cu abo ta parti esencial di su futuro.
Bisa cu bo casa no ta sirbi pa nada, mientras cu e ta esun cu ta trece pan den cas, y ta yuda bo den tur cos. Papia malo di bo propio esposa kende ta mama di bo yiunan. Desea malo pa bo doño di trabao for di unda bo pan ta bini. Cana for di boluntad di Dios y spera cu bendicion lo alcansa bo. Bebe un remedi y bisa cu e remedi no ta yuda bo cu nada. Sali cas bay busca trabao , y bisa cu bo mes boca cu bo no ta haya. Papia malo di bo auto, en bes di cuide y pidi Dios yuda bo pa bo haya un nobo. Bisa cu bo propio boca cu ningun hende no por yuda bo. Haci oracion sin ta kere den Dios, y duda cu bo por sali for di bo situacion. Pidi Dios un milagro y duda den Dios su autoridad pa duna bo. Pleita pa algo cu bo sa cu no tin derech’i riba dje. Stima placa mas cu hende, cana cu un mente totalmente materialista. Limita e poder di Dios den bo bida, haci manera cu Dios no por drecha e situacion. Haci hende bo Dios, kere den hende, pa nan placa y nan poder. Manipula bo propio famia.
Tur esaki ta cosnan cu a pone bo cosecha locual cu bo no tin mester den bo cas y bo Famia. Pero si bo pone bo Fe den Dios y habri bo curason pa Dios, y tene temor di Dios, y kere den bo curason cu Dios por, lo bo mira cosnan grandi sosode den bo bida, pasobra pa Dios nada ta imposibel.
Si bo ta biba un bida den Amor y Pordon, lo bo ricibi bo milager. Laga bo boca papia locual bo curason ta anhela.
Nunca papia locual bo no ta desea, no hacie ni pa bo mes ni tampoco pa otro hende. Laga tur bo deseonan ta conoci dilanti di Dios, y cu gradicimento, pasobra Dios nunca lo laga bo desampara.
Sinceramente
Pastor Marcel Balootje.
