Diadomingo anochi faltando algun minuut pa Toque de Queda drenta na vigor un melding a drenta di un accidente frontal na Washington, Noord.
Polisnan cu a bay na e sitio a topa net un tiki pazuid di Papiamento Restaurant, un Chevrolet SUV cora di e modelo Traxx na banda di caminda y un tiki mas pa Noord un otro Chevrolet Shinishi di e modelo Spark.
Segun informe no-oficial, e Chevrolet Spark tabata bayendo Noord ora cu e chauffeur a wak e Chevrolet SUV para riba e caminda contrario. E chauffeur di e Chevrolet Spark a laga sa cu diripiente e Chevrolet SUV a dicidi di bira su dilanti pa baha for di caminda. El a purba di brake pero e tabata envano. E impacto a zwaai su vehiculo, a pone draai y bay para na banda di caminda.
E chauffeur di e SUV cora sinembargo a laga sa cu en berdad el a bira dilanti e Chevrolet shinishi, pero cu e auto Spark tabata core asina duro, cu nunca e no lo por a para na tempo anyway.
Afortunadamente niun hende no a sali herida. Pues no tabatin mester pa Ambulance yega na e sitio. E daño material si tabata considerabel.
Polis a tuma tur dato, mientras personal di e Roadservice a percura pa nan tin tur potret di e marcanan riba caminda p’asina haya un miho idea con e accidente tuma luga.
