Ta trata di un caso cu a keda trata recientemente den Corte y e victimanan tabata dos mucha muhe. E hecho a tuma a luga entre 2013 y 2018, menor di 12 aña y menor di 16 aña. Aunke Corte a haya e homber aki (C.C. Croes) culpabel di a penetra un di su bisanietanan dilanti y patras cu su dedenan y cu e otro el a comete actonan di inmoralidad, a dicidi di dun’e un castigo combina debi na su edad avansa.
Actitud straño di e dos menornan aki ta loke cu a pone e mama cuminsa investiga y asina a bin saca afo pakico e muchanan a bira manera rebelde y a dicidi di haci denuncia mesora na autoridadnan. Segun investigacion cu autoridadnan a haci, basa riba declaracion haya di e dos menornan, di e mamanan, y di e “oppas”, Hues a conclui cu e declaracion di e muchanan ta veraz. Un di nan el a penetra cu su dede y su huñanan largo a causa dolor na esun mas chikito, kende e mama a bin constata cu su parti abou tabata cora, ora cu el a keha cu e ta sinti dolor. E otro victima menor di edad e bisawelo tabata mishi cu su pechonan y su coi sinta.
Abogado di e acusado a pidi Corte pa declara e acusado liber. Esaki pa motibo cu e ta bisa cu declaracion di e dos victimanan no ta detaya, no ta consecuente y riba algun punto ta contradictorio, pa cual e ta considera esakinan no confiabel y no por contribui na condena di e sospechoso.
Corte di su banda a haya cu e declaracion di e muchanan ta haya sosten den otro mes, pasobra loke nan tabata bisa ta cuadra cu otro. Esta di a mira loke e bisawelo a haci cu e otro. Pero tambe den declaracion di e persona cu ta cuida nan. Asina por ehempel el a declara cu cada chens cu e bisawelo haya, e ta bay den e camber unda e muchanan ta. Hasta un biaha el a core cu ne for di e camber. Un biaha el a haya e acusado tras di cortina cu e dos muchanan. Un di e muchanan a bisa cu e ta cambia paña tras di e cortina y su bisawelo a bini eytras.
E mama a conta con den e periodo di e sucedido el a mira un cambia den comportacion di su yiu muhe. El a bira rebelde y a hib’e psycholoog pa ayudo. Esaki ta caracteristica di muchanan victima di abuso sexual. Tambe el a declara cu e yiu a cont’e cu su parti abou ta pica y ta haci dolor. E mes a constata cu esaki tabata cora. Tur esaki ta cuadra cu loke e victima a conta, di e dolor cu el a sinti door di e huñanan largo di e bisawelo.
Loke tanto e mama como e “oppas” di esun mas chikito a haya straño ta cu e bisawelo tabata duna e dosnan aki placa, locual e no tabata haci cu e otro nietonan.
Hues: Bo no a pensa e daño cu Bo ta haci bo bisanietanan?
Hues a bisa e acusado cu tur esaki ta haci cu e acusacionnan contra dje ta proba, di a penetra un di su bisanietanan y a mishi cu e otro. E veredicto ta bisa cu e hechonan a tuma luga basta frecuente y diferente biaha pa siman. E muchanan tabata den un situacion hopi vulnerabel y e homber a abusa di su posicion di adulto y bisawelo di e muchanan. No solamente esey, pero el a laga nan marca pa resto di nan bida pasobra no ta un hende straño pero nan propio bisawelo. “Bo a pensa solamente riba bo mes, pa satisfac’e bo mes y no a pensa niun momento riba e daño cu bo ta causa na bo bisanietanan.”
Aunke Hues a bisa cu e tipo di delitonan aki ta cay bou di categoria di hechonan castigabel cu ta un violacion serio di ordo publico y inkietud den comunidad, e ta adapta e castigo cu Ministerio Publico a pidi. “Bo merece un castigo di prizon, pero ta tene cuenta cu nunca antes bo a yega di wordo condena.” Pero tambe a tene cuenta cu su edad avansa, su estado di salud malo y p’esey a impone 30 luna di cual 10 luna ta condicional y 2 aña di prueba.
Nota di redaccion: Ta custumber di 24ora.com pa den tur caso pone nomber completo. Sinembargo den e caso aki mester a pone den balans interes pa pueblo haya sa ken e persona aki y interes di e victimanan di proteccion pa no sufri mas cu e sucedido of cu e tin un otro impacto mas grandi riba dje pa henter pueblo di Aruba haya sa ken nan ta, siendo menor di edad ainda. Esaki ta e motibo cu a dicidi di pone solamente e inicialnan.
