Hopi bez den mundo tin hendenan cu ta traha cu amor y dedicación pa varios aña den un solo compania. Persona cu ta entrega su curazon pa mehoracion di projectonan nobo of ta lanta y introduci ideanan fresco pa mehoracion di su lugar di trabao y coleganan. E atención cu e ta duna ta wordo braza y na momento cu e wordo ehecuta exitosamente tur hende ta sinti e emoción di a cumpli cu nan trabao y cu comunidad.
Esaki ta locual cu Belkys a ehecuta pa 38 aña y nunca a pidi nada a cambio cu no ta simplemente e satisfacción riba su cara ora cu e mira miembronan y coleganan feliz. Belkys Parisca Flores ta nace dia 22 di mei di aña 1958 y a drenta servicio di Biblioteca dia 16 di januari di aña 1979 unda el a traha te dia 15 di october 2017. Despues cu Belkis a termina su M.A.V.O., ela sigui e curso di L.O. Spaans y tambe a sigui A.P.A. (Academia Pedagogico Arubano) pa 1 aña, Belkys a dicidi di drenta e proceso laboral y a solicita pa bin traha na Biblioteca y dia 16 di januari di aña 1979 unda ela cuminsa su carera profesional na Biblioteca Nacional. Belkys un persona hopi dinamico y creativo a traha cu Biblioteca Hubenil y tambe un di su empeño cu tabata e famoso “Bibliobus”. Na aña 1979 den cuadro di su trabou ta bay Hulanda, ademas di esaki a atende diferente seminario, workshop di poppenkast y na aña 1986 e ta keda nombra como hefe di Servicio Mediateca Escolar, conoci como SMD, te cu dia cu el a fayece. No ta falta un ocasion cu Belkys no ta decora y semper tabata pone un tono festivo den su departamento como tambe den biblioteca y hopi biaha un exposicion tambe ta forma parti di esaki. Cada cuater aña tin mundial y esaki realmente ta un fiesta grandi den SMD. Nan ekipo favorito ta BRAZIL y esaki ta keda resalta den tur su facetanan. Un persona cu a dedica su bida na trabou di Biblioteca y cu mas di 38 aña di servicio como empleado publico sigur a haci un diferencia den bida di hopi di nos muchanan cu awe ya ta adulto y durante su trayectoria a logra hopi tambe pa engrandece trabou di Biblioteca na servicio di comunidad di Aruba.
E logronan di Belkys durante su añanan trahando na Biblioteca ta grandi:
-Motor tras di lanta schoolbibliotheken (pa menciona algun na Maria School na Sta. Cruz; St.
Anna School na Noord; Colegio Ora Ubou na Tanki Leendert; Pius X na Dakota
-Na aña 1981 ta publica e prome bulletin di Buki-Buki Bulletin. Esaki tabata un iniciativa di e
prome Personeelsraad. E motor tras di esaki tabata sr. Vito Oduber d.f.m. E kaft tabata un lora,
ya cu loranan ta papia hopi y ta ripiti locual nan tende.
-A forma parti di diferente Personeelsraad y tabata gusta organisa actividad;
-Desde 1990 ta participa y duna su contribucion na briefing y vakoverleg dentro di e structura di
Biblioteca;
-Na aña 1992 a representa Aruba cu participacion na Carifesta. A participa cu Garoshi di Alegria
cu e obra original E baka pinta. Esaki conhuntamente cu su coleganan Des Croes y Lenchi Lopez.
Esaki a tuma luga na Trinidad.
-Organisa programanan durante vakantie grandi y sali for di edificio di Biblioteca cu actividad cu
e bibliobussen cu ta Compa Nanzi y Shon Lectura y Rey Mucha (despues e bus aki a haya e
nomber di Shon Shoco);
-A coordina actividadnan pa Biblioteca Hubenil;
-Ta traha riba programa “van eisen” y hunto di Director di Biblioteca Nacional Aruba, sra. Astrid
Britten, nan a biaha pa Hulanda pa adkeri e ultimo bibliobus Shon Shoco;
-E aña aki nos ta celebra XXV aña Festival di Buki pa Mucha. Belkys tabata forma parti pa hopi
aña di comision Festival di Buki pa Mucha y a aporta tremendamente na idea y semper tabata
fungi como stage-manager durante apertura di Festival di Buki pa Mucha;
-Na ocasion di celebracion di trabou di Biblioteca su 60 aña, na 2009, ta inaugura Sala Diamante
y ta dedica esaki na Belkys como trahado cu mas aña di servicio den nos organisacion;
-Loke sigur ta resalta ta Belkys su pasion pa traha cu mucha y tabata un gran promotor di
lesamento y a organisa masha hopi actividad na beneficio di nos muchanan.
Coleganan di Biblioteca sigur lo haña su falta.
Belkys den e mundo di Musica y teatro tambe ta conoci. Ta ken no conoce “Katrinchi” di teatro
Harlekino di de Trupialen?. Belkys a drenta grupo de Trupialen na 1970 cu e tempo ey tabata
bao dirección di Frere Alexis. Aki ela forma su abilidad den canto y tambe cuarta y sonfonia di
boca. Belkys a toca huntu Combo de Trupialen y después tambe su pashon pa poppenkast unda
eta esun di mas chikito den e grupo di hende hombernan. Aki su estatura a yuda hopi pa e por a
actua cu facilidad como “ Katrinchie” den poppenkast.
Semper Belkys tabata duna di su parti p atey na caulkier evento di Trupialen pa asina duna su
sostén anke salud no tabata permitie tur ora.
Nos no por lubida su empeño semper pa educa nos muchanan pa cual e tabata tin su exitoso
programa na radio 1270 “Ata Wimpiri” pa varios aña y después tambe a join pa un tempo su
comer Elsa Krosendijk den e programa Fantasilandia. Semper atento y a yudaa lanta y guía
hunto cu famia Hasham y su ruman Lorenzo grupo di subrinanan “Polymnia”. Semper
pendiente con pa entretene famia y amigonan. Su talento den pintura y den poema. Un talento
scondi cu awor ta sosega.
Danki colega, danki artista,danki Giechi, danki Tante Ties, danki Amiga.
Mayan 21 di october, nos ta despedi di Belkys. Hopi forsa na su rumannan Lorenzo, Gina y Gino y nan famia. Cu nos colega Belkis sosega den brasa di Señor y te despues.
