Koninklijke Bibliotheek di Hulanda ta reuni regularmente cu e bibliotecanan di Caribe Hulandes pa traha hunto riba diferente punto. Entre otro nos ta trahando hunto cu KB pa loke ta trata e online bibliotheek, e posibilidad pa haci curso online, proyecto cu hoben y donacion di buki y mueble.
Den e proyecto di donacion di buki cu ta bin di diferente biblioteca na Hulanda a busca cooperacion di Biblionef Hulanda cu a tuma na su encargo e surtido y transporte di e bukinan pa Aruba. Na Aruba Carla van Eerden, representante di Biblionef Aruba a entrega un carga di 51 caha cu buki pa biblioteca cu un total di mas cu mil buki. Michelle Roos, hefe di e departamento di Catalog a ricibi e cargacion aki. Biblioteca a haya buki pa mucha di tur edad y tambe buki pa adulto, bukinan cu storia y bukinan informativo cu ta duna informacion riba diferente topico. Sigur sigur un bunita coleccion cu biblioteca por fia su miembronan. Biblioteca ta contento cu e donacion di e bibliotecanan na Hulanda y tambe kier gradici Biblionef pa e cooperacion.
Biblionef ta un instancia cu ta traha rond mundo pa stimula lesamento y laga tur mucha conoce e goso di lesamento. Biblionef ta enfoca riba mucha cu no tin acceso facil na buki. Biblionef semper a traha hunto cu Biblioteca Nacional Aruba. Pa medio di e Mediateca escolar scolnan por haya coleccionnan di buki pa fia. Biblionef Aruba ta parti bukinan na scolnan na Aruba ya for di aña 2000 caba.
Desde 2020 Biblionef ta colabora cu Koninklijke Bibliotheek na Hulanda pa manda mas buki pa Aruba y e otro islanan di Caribe Hulandes pa percura cu lesamento por sigui normal na scol y na cas.
