Awe marduga, algo pasa di 4:00 am, a sosode un accidente riba Avenida Nelson Orlando Oduber. Ta trata aki di un auto marca Toyotaa color shinishi cu varios hoben aden. E chauffeur a perde control riba e auto, a baha caminda, dal den un pal’i luz y bay cay den un rooi canto di caminda.
E prome meldingnan cu a yega cerca polis tabata mustra di ta un accidente hopi serio. Pero na momento cu e prome unidad a yega na e sitio di accidente, a constata cu tabatin basta daño material, pero cu danki Dios no tabatin herido. E auto a haya basta sla y a ranca un palo di luz, cu sin duda ta bin cu su gastonan pa drech’e.
Polis a pone e chauffeur di e auto supla, pa test si e tabata burachi. A resulta cu el a midi net na e limite permiti pa ley, pues tabatin drinks aden pero no por bisa e ta burachi. Asina mes esey no a scap’e un bon zundra di polis. A manda yama NV Elmar pa presenta na e sitio pa asina por drecha e palo di luz y regla e kabelnan di coriente cu a keda core riba caminda.
Claro cu e trabounan aki ta tuma nan tempo y ta encera cu NV Elmar mester saca tecniconan for di cas pa subi warda mesora pa traha riba kabel di coriente activo, den pleno marduga y memey di caminda. Mester a tene e caminda cera pa un rato pa por a haci e trabou necesario.
