Ora nos ta kere den Dios, nos mester obedece Dios, sino ta tempo perdi.
Hopi ta para halsa bos y bisa cuanto nan ta stima Dios, cuanto fe nan tin. Pero ora ta yega e momento di obedencia na Dios, tu cos ta cambia y multitud di excuus ta bini pa dilanti.
Nos bista mester ta centralisa riba Crsito Hesus, e Salbador di nos alma y e Redentor di nos bida. Nos mester ker’e y obedec’e pa nos oracion por tin exito.
P’esey ora nos ta haci oracion nos mester haci manera Señor a siña nos; Ma abo, ora bo ta haci oracion, bay den bo camber di mas paden y ora bo a cera e porta, haci oracion na bo Tata cu ta den scondi, y bo Tata cu ta mira den scondi lo recompensa bo (Mateo 6:6).
Pasobra ta masha hopi distraccion ta presenta ora hende mester haci oracion.
Un bon conseho pa un y tur ta cu ora bo ta bay haci oracion, paga bo telefon y lag’e pafo di camber, pa asina ningun mensahe of misscall por distrai bo for di bo tempo den presencia di Dios.
Ora nos ta obedece Dios, nos tin di haci exactamente manera Dios ta bisa. Pasobra ora nos no ta obedece ta envano nos ta kere, pasobra den obedencia tin confiansa y ora Dios mira confiansa. Di mes Dios ta sa cu tin fe y asina nos ta yega na nos milager.
Abraham a obedece Dios y a bay bon, su obedencia a hacie tata dje nacionnan. Noe a obedece Dios y tur cos a bay bon, el a traha e arca. Asina e mes y su famia tabata salba.
Isaac a obedece Dios y tur cos a bay bon. El a sembra cunuco den tempo di hamber, secura y a cosecha.
Hopi biaha nos no ta ricibi locual nos ta spera, pa motibo di desobedencia. Nos ta papia algo cu nos boca, pero nos actitud ta contradeci nos oracion.
Den Juan capitulo 4, e oficial di rey a pidi Hesus pa bay su cas cu ne pa cura su yiu, pasobra e yiu ta muriendo: Hesus a contesta “bay numa bo yiu ta bibo.” E homber a kere e palabra di Hesus a papia cu ne y el a bay. Mientras cu e tabata na caminda ainda su esclavonan a bin contr’e y bis’e bo yiu ta bibo.
Laga nos concentra un momento riba e obedencia cu e homber ey tabatin den Hesus, pasobra el a sali bay busca Hesus personalmente y awor e ta bay cas cu e palabra cu Hesus a bis’e.
Ora nos ta obediente na Dios, su palabra ta haci milager den nos bida, e portanan lo habri pa nos, enfermedad ta sana, pasobra nos ta obediente.
E mucha muhe cu diesdos aña cu problema di sanger a pensa y e tabata obediente, el a bisa, si mi mishi solamente cu e zom di su bisti lo mi ta sana, y su obedencia a hib’e na su milager.
Bo obedencia ta bal mas cu bo placa, pasobra bo no por cumpra bo sanacion, pero si bo kere den Señor y ta obediente na Señor lo bo ricibi bo sanacion.
Haci manera bo ta obedece, tambe ta falta di obedencia. Obedencia ta parti di bida di esunnan cu ta stima Dios. Esunnan cu berdaderamente kier mira Dios su misericordia den nan bida.
No ta tempo pa bay tras di ningun clase di distraccion, pero ta tempo pa kere y ta obediente na Dios su palabra. Pasobra solamente den obedencia na Dios nos por bay dilanti.
Pastoor Marcel Balootje
