Mervin Wyatt-Ras, parlamentario pa Fraccion A.V.P., tabata un di e iniciadornan pa loke ta trata e ley di ombudsman. Dialuna atardi e por a mira con na ultimo momento a haci un cambio. E parlamentario a comenta cu ya pa varios aña ta trahando riba e ley aki. Desde aña 2012 Ras conhuntamente cu Lopez-Tromp a entrega un mocion pa bin cu un “kinder ombudsman” pa Aruba. Despues, na aña 2013 a cuminsa traha riba e ley, na 2020 a pasa e ley. Awo, na 2023, ta trata un cambio den e ley cu ya caba a pasa e tempo ey.
Wyatt-Ras a splica cu tambe a reuni tocante e cambio di contitucion pa por ancra e ombudsman den constitucion. Sinembargo, segun Wyatt-Ras, mirando e falta di tolerancia di parti di e Presidente di Parlamento cu en bes di consulta cu diferente fraccion prome el a djis bin cu e ley bek despues cu a sala despues di a schors e reunion. Segun Ras, asina e Presidente di Parlamento kier a “bulldoze” e ley e tempo aya.
Segun Wyatt-Ras, e ley cu a presenta no ta duna e ombudsman e instrumentonan pa e por para fuerte na momento cu por ehempel kier dun’e retiro. Conhuntamente cu Miguel Mansur a presenta un amienda caminda ta pidi cu dos tercera parti por nombr’e y retir’e. E mocion e resulta cu 9 na fabor y 11 contra.
“E ta lamentabel cu cos mester bay asina pero e ta refleha tambe e forma con Parlamento ta funciona”, Wyatt-Ras a enfatisa. Locual cu e fraccion kier evita ta pa cu na momento cu e ombudsman haci su trabou manera mester ta, por djis yega y hal’e un banda si ta e caso cu e tuma un decision cu no ta na agrado di Gobierno. A.V.P. a vota contra di e ley y ta spera cu na momento cu bin cu e cambio di constitucion por sinta na mesa cu e fraccionnan pa e ombudsman por haya un ley cu ta sosten’e manera mester ta.
