Bendicion no solamente ta placa, auto, luho, posicion, propiedad, pero ora nos ta papia di bendicion nos ta papia di nos salud na prome luga, un famia estableci den Cristo, un matrimonio ehemplar cual ta duna ehempel na otro con Dios kier pa hende biba cu otro. E yuinan obedecido na Señor y tambe na nan mayor.
Pasobra e palabra di Dios ta siña nos lo siguiente den Santiago capitulo 1 vers 16+17: No sea gaña, mi rumannan stima. Tur bon regalo, y tur don perfecto, ta for di ariba, y ta baha bin for di e Tata di lusnan, serca kende no tin variacion ni sombra di cambio.
Si un hende bendiciona bo ta pasobra Dios a pone den su curazon, pa e bendiciona bo, si un hende mester kita un cos for di un hende pa e duna bo ya esey no ta un bendicion mas, pasobra locual Dios tin pa abo, ta pa abo e ta, Dios no ta kita for di ningun hende pa duna otro hende.
Si un hende mester duna bo algo pa bo keda serca dje, esey no ta bendicion esey nos ta yama cumpramento di hende, manipulacion, y hasta corupcion y perdemento di integridad.
Un hende no por bendiciona bo cu un cos cu no ta di dje, pasobra e ora ey e bendicion no ta autentico, pesey Dios ta siña nos den Su palabra pa nos ta alerta, cu tur bendicion y tur don ta bini di Dios.
Tene cuenta pasobra mundo ta malo, diabel no ta parti don ni tampoco bendicion, diabel por influencia hende cu maldad pa asina nan usa locual Dios a duna nan pa haci malo en bes di haci bon y asina nan ta termina malo si nan no arepenti.
Deuteronomio capitulo 28 vers 2 ta bisa: Y tur e bendicionnan aki lo bini riba bo y alcansa bo, si bo obedece Señor bo Dios. Aki nos por mira cu obedencia y humildad ta atrae bendicion den nos bida.
Pasobra Dios no ta bendiciona hende arogante y orguyoso, y ta conoci pa nos tur cu hende arogante y orguyoso ta yega na cos y posicion pa medio di gañamento, manipulacion, corupcion, inmoralidad, usando strategia scur pa yega na nan meta, tur esaki nos ta avisa abo como mayor, pa bo pone bo yuinan na altura e clase di bida cu nan tin di hiba dilanti di Dios pa asina bendicion di Dios por alcansa nan bida.
No ta pasobra bo tin hopi hende rond di bo esey ta nifica cu bo ta bendiciona, no ta pasobra tin hopi hende obedece bo esey ta nifica cu bo ta bendiciona, pasobra amistad cu mundo por duna bo hopi cos, pero bo ta cay den enemistad cu Dios.
Wak rond mundo, bo ta mira hopi hende den poder ta haci politica yena cu odio y ta haci malo y asina nos tin compronde con e asunto di bendicion di Dios ta hinca den otro.
Ta e bendicion di Dios ta haci rico,y E no ta agrega tristesa na dje.(Proverbionan 10:22).
Con nos por kere un hende ta bendiciona, pero e no por drumi anochi, ni tampoco e no por confia ningun hende rond di dje? Ta un bendicion hopi straño .
Isaias capitulo 26:3 ta bisa: Lo Bo warda den pas perfecto esun cu su pensamento ta permanece den Bo pasobra e ta confia den Bo.
Huntu cu Señor su bendicion ta bini Señor su pas.
Sinceramente
Pastor Marcel Balootje.
