Un biaha mas habitantenan di Simeon Antonio ta haya nan mes den desesperacion bou huma toxico y explocionnan di candela procedente di e dump na Parkietenbos. Esaki no ta noticia nobo. Sinembargo, recientemente Secretario di Estado Alexandra van Huffelen a indica den un carta recien dirigi na activista y habitante di vecindario Parkietenbos, mr. Anouk Balentina, cu gobierno tin e deber di actua riba e problematica aki y pa sigui trece e problema aki dilanti na autoridad local y manten’e altante.
Balentina a sigui e conseho di e Secretario di Estado y a sali dilanti un biaha mas encuanto e problema aki, asina mustrando cu esunnan responsabel no ta cumpli cu nan deber y cu ta sigui trapa riba nos estado di derecho.
Nos ley di molester ta menciona cu ta prohibi pa procesa desperdicio y kima sin permiso di molester of exepcion via di un landsbesluit (HAM). Serlimar, cu a base di ley di Serlimar, ta e unico instancia legalmente apunta pa cu maneho di desperdicio, mester di permiso pa por procesa desperdicio y kima na e sitio. Pero pa por otorga un permiso asina lo mester tene na cuenta cu, segun ROPV, esaki no lo ta posibel na e sitio (Parkietenbos).
Segun ley di desaroyo territorial (LRO) y e Plan di Desaroyo Teritorial cu reglanan, ROPV, ta prohibi pa tin instalacionnan cu ta procesa desperidicio na e sitio specifico Parkietenbos. Pa locual ta instalacionnan existente, ta stipula den ROPV precisamente cu no mag di tin nada cu por crea of causa molester pa e bario. Esaki ta nifica cu tin violacion continuo di e ley y reglanan stipula.
Na februari ultimo, Ministerio Publico a indica cu lo duna e ministro encarga cu maneho di desperdicio, te fin di aña pa soluciona e problema di e kimamento ilegal y cu na fin di 2022 lo haci evaluacion nobo di e denuncianan entrega. Sinembargo, Ministerio Publico a duna di conoce cu pa locual ta e incinerator si mester keda enforsa y mantene na e rekisitonan. Cual no ta sosode!
Den siman tin kimamento di sludge procedente di RWZI den incinerator sin cu ta tene cuenta cu e rekisitonan di e permiso di molester, esaki banda di e kimamento den aire liber cu ta tuma luga constantemente. A pesar cu ta entrega keho na autoridadnan, nan no ta duna oido na e violacionnan di ley, derecho humano y veredicto di hues di Corte Civil. E veredicto di corte civil di augustus 2020 di un caso entama door di Anouk Balentina contra Pais Aruba ta menciona cu ta prohibi pa kima ora cu biento no ta claramente direccion pa lama y si e ta claramente direccion pa lama solamente mag di kima den un luga specifico indica cant’i lama na zuidoosten.
E candela di awe tabata banda west y no na e sitio stipula dor di hues. Pues, no ta cumpli cu veredicto di hues tampoco. Balentina ta amplia cu pa pone dwangsom, segun e veredicto, mester paga un deurwaarder adelanta y esey ta sali 450 florin, cual suma no ta un suma cu cada ken tin den nan saco y ta abusa y probecha di esaki! Nan sa cu ciudadanonan no tin placa pa lanta caso contra gobierno y cu hasta un veredicto no tin manera pa enfors’e si bo no tin e placa disponibel, mientras gobierno no ta haci algo pa corigi e situacion y asina ta permanece den violacion continuo y structura di derecho fundamental.
Ta conoci cu autoridad encarga cu e supervision no ta accesibel den weekend. Desde un distancia por a tuma nota cu Parkietenbos tabata bou di huma y mas trempan e huma a plama ful den e bario. Por a confirma tambe cu e “windsock”, cu hues di corte civil a exigi pa gobierno pone, ta mustra direccion di tera. E biento no ta constante y esaki ta causa cu di un momento pa otro e bario ta hay’e bou di huma. Esaki ta causa hopi problema di salud, cu ta violacion di e derecho fundamental di ser humano, stipula den e tratado Europeo di Derechonan Humano (EVRM), derecho di bida e.o. den constitucion ta menciona e deber di gobierno pa proteha salud di cada ciudadano (zorgplicht).
Ta remarcabel cu ta bin cu un ley pa prohibi humament’i sigaria, sinembargo e habitantenan di Simeon Antonio no tin scapatorio di huma toxico. E preocupacion selectivo di gobierno ta di lamenta. Tambe kier bin cu ley di naturalesa den constitucion pero ni e leynan cu tin ta wordo enforsa y supervisa.
Na momento cu e biento ta claramente riba lama por a mira e huma ta plama tambe den e naturalesa incluyendo e rifnan cu ta protehi den nos ley di proteccion di naturalesa (natuurbeschermingsverordening). Esaki ta un otro violacion mas.
Ta mustra cu e locacion y operacion di e dump na Parkietenbos no ta conforme varios ley y Balentina ta pidi tur instancia, parlamentario- y fundacionnan cu t’ey pa defende naturalesa y derecho humano, pa nan sali dilanti y no bira complice di esaki y finalmente ta haci apelacion na autoridad y gobierno pa respeta nos leynan, cumpli cu nan deber y responsabilidad y duna respet na nos estado di derecho.
