Awe mainta pa mas of menos 9:30 am diripiente coriente a bay den e barionan di Madiki Kavel y Ponton. Mesora tur hende a pensa cu esaki por tin di haber cu e situacion na WEB, cu a laga henter Aruba den un blackout diasabra. Sinembargo, diadomingo den dia atrobe algun bario a keda sin coriente, pero a bisa cu tabata problema cu NV Elmar. Awe siman a habri cu e mesun tiro, pero a resulta cu no tabata WEB. sino NV Elmar cu a bin topa cu un fayo. Pero, den menos di un ora y mey, a desvia e fayo, a reemplasa e ekipo y a reconecta coriente bek den e areanan afecta.
Ta resulta cu den e trafohuis situa net patras di Xavier University den Santa Helenasstraat tabatin un fayo den e ekipo di 12 mil volt cu ta percura pa distribui coriente di 110 volt pa casnan den e vecindario. E tecniconan di NV Elmar a presenta un rato despues cu un “trafo” nobo cu nan tabatin den stock mes y a reemplasa esun cu a kima. Di e forma ey a regla pa tur e casnan rond por a haya coriente bek.
Mester menciona cu e fayo den e trafohuis no tin nada di haber cu e blackout di diasabra atardi, por lo menos esey ta pensamento di e tecniconan di NV Elmar cu tabata na e sitio. Kico a pasa cu ne, nan no sa ainda, pero nan lo hib’e Elmar pa revis’e, analis’e y drech’e. Pero e prioridad tabata pa reemplas’e y asina reconecta suministro regular di coriente den e barionan afecta.
