Kiwanis Club of Palm Beach conhuntamente cu St. Dominicus College y St. Franciscus College, recientemente a anuncia e “Terrific Kids of the Year” na e scolnan aki. E reconocemento aki ta e culminacion di e programa social yama “Terrific Kids” cu Kiwanis Club of Palm Beach ta sostene na e schoolnan menciona.
E pandemia COVID-19 a haci cu e aña escolar aki tabata uno dificil pa ehecuta e programa. No obstante, ambos scol a logra di finalisa henter e programa independientemente. Tabata solamente recien na Juni cu e miembronan di Kiwanis por a bishita e scolnan atrobe pa acompaña e ultimo actividadnan. P’esey un palabra di elogio specialmente ta bay na e maestronan cu a guia e programa durante e temporada dificil aki.
Kiwanis Terrific Kids ta un programa di reconocemento escolar cu ta promove desaroyo di balornan manera caracter personal, autoestima y perseverancia. E palabra “TERRIFIC” ta un abreviacion na Ingles cu ta consisti di e prome letternan di “Thoughtful, Enthusiastic, Respectful, Responsible, Inclusive, Friendly, Inquisitive and Capable”. E studiantenan den e programa ta traha cu nan maestro pa establece e metanan pa mehora comportacion, contacto cu otro, presencia y/of trabao escolar. Terrific Kids ta un programa di Kiwanis International. Na Aruba, Kiwanis Club of Palm Beach ta patrocina e programa na e dos scolnan menciona y esaki ta encera sosten di diseño di e programa, sosten financiero, guia y supervision.
Durante e aña escolar tin diferente reconocemento intermediario y na final di e programa, na luna di juni, ta reconoce e “Terrif Kids of the Year”. E alumnonan aki mester logra por lo menos 7 di e 8 letternan di e palabra “TERRIFIC” durante e aña. E celebracion ta encera anuncio di e ganadonan, otorgamento di e reconocemento y sacamento di potret. Despues tin un celebracion grandi cu cuminda y bebida caminda ta participa e alumnonan cu a participa, e maestronan y miembro di Kiwanis Palm Beach. Na e ocasion aki e ganadonan ta ricibi nan certificado special di “Terrific Kid of the Year”.
Durante aña escolar 2020-2021 a participa un total di 265 mucha na St. Dominicus College y 192 na St. Franciscus College. Un gran pabien di parti di Kiwanis Club of Palm Beach ta bay na tur mucha cu a participa y e staf maestro cu a contribui. Un pabien special ta bay na e 31 alumno di St. Dominicus College y e 26 alumno di St. Franciscus College cu a logra obtene e certificado maximo di “Terrific Kids of the Year” 2020-2021. Tambe e scolnan a scoge dos ‘TK Teachers of the Year’. E maestronan aki a resulta di ta pa St. Dominicus College: Liza Maldonado-Oduber y Mario Lobo; y pa St. Franciscus College: Souell Maduro y Rosalinda Hayer. Finalmente un palabra di pabien ta bay na e cabesantenan di e scolnan, respectivamente Caroline Cardose (St. Dominicus College) y Nadine Kirindongo (St. Franciscus College). Riba e potretnan adhunto por mira e maestro-, alumno- y miembronan di Kiwanis Club of Palm Beach na e clebracion final.
Mas informacion riba e programa por haya riba e a Facebook fan page di e schoolnan respectivamente pa St. Dominicus College: https://www.facebook.com/Dominicuscollege-Basisschool-435829879931141 y pa St. Franciscus College: https://www.facebook.com/StFranciscusCollege.
Kiwanis Club of Palm Beach
Kiwanis Club of Palm Beach Aruba ta forma parti di Kiwanis International, un organisacion mundial di boluntario dedica na cambia mundo, cuminsando na un comunidad y un mucha. Nos ta un organisacion den crecemento, dedica na yuda muchanan di mundo henter hisando nan calidad di bida.
Pa mas information di Kiwanis Club of Palm Beach bishita nos webpage na www.kiwanispalmbeach.com of nos Facebook fan page na https://www.facebook.com/kiwanispalmbeach.
