Awe, Banco Central di Aruba (BCA) a firma un contract cu equensWorldline SE, e lider Europeo den industria di pago y servicionan di transaccion, pa suministra un infrastructura nobo y central pa sistema di pago instantaneo, cu lo reemplasa e sistema actual di “clearing & settlement” di BCA entrante januari 2019.
Cu e implementacion di e sistema nobo di pagonan instantaneo, esta e asina yama “Instant Payments Clearing and Settlement Mechanism” (IP CSM), lo cambia completamente e sistema tradicional pa un sistema cu ta procesa pagonan instantaneo. Desde 2019, lo procesa tur pago den nos florin entre banconan inmediatamente 24/7/365.
E cambio di e sistema actual di BCA, esta e “clearing and settlement system”, pa un infrastructura nobo di pago instantaneo ta un paso importante pa e modernisacion di e sistema di pago na Aruba. E banconan local a compromete nan mes pa traha hunto cu BCA pa realisa e proyecto importante aki pa por brinda Aruba un infrastructura nobo y solido pa innovacion y solucionnan di pago pa e proximo generacion.
equensWorldline lo suministra e sistema di pago instantaneo den florin y lo ta basa riba standardnan internacional. Despues di e implementacion aki e pagonan entre banconan local, manera transferencia di credito, procesamento di batch (“batch processing”) y mensahenan di peticion pa pago lo wordo procesa via e infrastructura nobo di pago. E contract cu equensWorldline lo tin un duracion di cinco aña.
“Nos kier modernisa nos infrastructura di pago pa mehora e eficiencia y pa ta ekipa pa e futuro desaroyonan den e mundo di pago. E escogencia pa equensWorldline tabata uno evidente basa riba nan trayectoria excelente y experencia. Nan ta ofrece diferente tipo di modalidad di “outsourcing” y nan tin un sistema di “back-up” completo cu ta garantisa disponibilidad y continuacion di e sistema pa procesa pagonan. Esaki ta duna nos e posibilidad di tuma e paso aki sin tin mester di haci inversionnan grandi den area di tecnologia y operacion interno. Ademas, equensWorldline a demostra di ta compronde e necesidad di e comunidad Arubano, manera por ehempel e servicionan di pago “online” of “in-store”, cu den futuro lo por wordo lanza cu e sistema nobo. Nos ta contento y orguyoso di a asocia nos mes cu equensWorldline, pa asina nos por ta e prome den Caribe pa implementa un sistema di pago instantaneo.”
“Den e ultimo añanan nos tabata enfatisa cu e sistema di pago instantaneo lo bira algo hopi normal. Desde 2019, ora e sistema nobo ta implementa, esaki lo ta posibel na Aruba tambe. Nos ta compronde loke Aruba kier logra, y nos por acomoda e necesidad aki cu nos sistema y infrastructura moderno. Nos solucion ta sostene tur tipo di servicio of producto di pago cu e sistema di pago instantaneo, manera P2P, P2B, den tienda, online y uzo pa companianan. Cubriendo ful e cadena di balor, desde e inicio di pago y e solucionnan di canal te cu e procesamento di “back-office” y e “clearing y settlement”, nos ta ful prepara pa sostene Aruba den e desaroyo pa facilita pagonan instantaneo 24/7/365.”
E meta principal di Banco Central di Aruba (BCA) ta pa contribui na e stabilidad financiero y e bienestar economico di Aruba. BCA ta realisa esaki door di implementa un maneho monetario efectivo pa mantene e balor di nos florin, promoviendo e solvencia y integridad di e sistema financiero y ofreciendo un sistema di pago efectivo y confiabel.
Ademas BCA ta encarga cu emision di e biyete y moneda di florin. Tambe BCA ta regula e fluho di pagonan internacional, y ta maneha e reserva di divisa di Aruba, como tambe supervisa e uzo di dje.
BCA a adopta un plan strategico “Bela yen: Nos Plan Strategico 2016-2020” (Bela Yen) cu e ambicion di ta un banco central prominente den nos region, caracterisa door di un cultura di integridad, excelencia y innovacion.
Mas informacion tocante Banco Central di Aruba ta disponibel riba e website di BCA: www.cbaruba.org
