Baila ta mucho mas cu solamente move riba ritmo di musica. E ta un manera pa conecta, disfruta, mantene curpa activo y comparti momentonan special hunto. Cu e pensamento aki, Centro di Bario Noord ta presenta “BAILE PA DOS,” un curso di baile specialmente prepara pa pareha cu ta desea siña pasonan nobo y pasa un dushi anochi hunto.
E curso ta facilita p’e conocido instructor Erwin Croes, kende durante e periodo di les lo guia e cursistanan paso pa paso den diferente disciplinanan di baile. E programa ta brinda un combinacion variado di ritmo y estilo, haciendo cu tin algo pa cada pareha cu gusta musica y baile.
Erwin tin un trayectoria largo den mundo di baile na Aruba. E tabata parti di e prome grupo di baile di Centro di Bario Noord (CBN) durante e tempo di Watapana Festival. Mas despues, el a dirigi e grupo di Baile di Cinta y Dera Gay di CBN.
Durante 10 aña, Erwin a duna les di baile na St. Anna School, y a prepara hopi mucha pa nan fiesta di quinceañera. Su amor y dedicacion pa baile a hiba su experiencia mas leu, unda el a forma parti di diferente grupo di baile, incluyendo Aruba Dance Formation, grupo cu el a pertenece durante 30 aña.
Cu Aruba Dance Formation, Erwin a presenta den diferente hotel durante anochi y tambe durante Bon Bini Festival. Su trayectoria artistico a hib’e y e grupo pa diferente pais y destinacion, incluyendo Hulanda, St. Maarten, Paraguay y North Carolina, unda nan a representa Aruba cu nan talento y pasion pa baile.
Cu su experiencia di tanto aña, Erwin Croes ta sigui comparti su conocemento y amor pa baile cu e siguiente generacion.
Y asina tambe participantenan lo tin oportunidad pa siña y practica Wals, Mazurka, Tumba, Son Montuno, Bolero, Merengue, Salsa y Bachata durante e 11 siman di curso. E variedad di ritmo ta permiti cu e cursistanan no solamente siña tecnica y pasonan nobo, pero tambe descubri diferente manera pa move hunto como pareha.
“BAILE PA DOS” ta cuminsa 23 di september 2026 y ta continua te 2 di december 2026. E lesnan ta tuma luga un biaha pa siman, tur diaranson, ofreciendo un momento ideal durante siman pa sali for di rutina, topa cu otro parehanan y disfruta di un ambiente social y alegre.
E participacion ta solamente Afl. 150.00 pa pareha. Pa garantisa un ambiente agradabel y suficiente atencion pa cada participante, e curso ta limita na 20 pareha, cu un maximo di 25 pareha.
Centro di Bario Noord ta invita parehanan di tur edad cu tin interes pa siña, move y disfruta pa probecha di e oportunidad aki. No tin mester ta un bailarin profesional; e curso ta un oportunidad pa practica, siña y disfruta hunto den un ambiente relaha y social.
“Siña marca pasonan nobo, move na ritmo y disfruta di un dushi anochi hunto” ta e invitacion di Centro di Bario Noord. Pa damas y cabayeronan cu ainda no tin pareha, no laga esaki tene bo atras! Inscribi bo mes y Centro di Bario Noord lo yuda conecta bo cu un pareha, pa asina bo tambe por disfruta di “BAILE PA DOS.”
Personanan interesa por inscribi via Centro di Bario Noord of contacta nan na +297 568-2935. E pago por ta haci via cuenta bancario: Stg. Centro di Bario Noord Aruba Bank #5600094.
Cu “BAILE PA DOS”, Centro di Bario Noord ta ofrece mas cu un curso di baile: ta un oportunidad pa crea conexion, comparti alegria y disfruta di musica hunto.
No warda! Inscribi bo pareha y bin baila cu nos!
