E talentoso vocalista Osdelly Lacroes a keda scogi pa representa Aruba den e Festival di Jazz Euro-Venezolano 2026, cu lo tuma luga na comienso di october na Caracas. E seleccion a keda confirma pa e comite di e festival na Venezuela despues di un recomendacion di Carlos Bislip, director di Scol di Musica Rufo Wever, siguiendo un peticion oficial di e Embahada Hulandes na Caracas pa un vocalista femenino di jazz.
E fundeshi musical di Lacroes a cuminsa for di tempo e tabatin apenas cuater aña di edad, cantando hunto cu su rumannan. Su trayectoria artistico ta diverso y ta cubri teatro, agrupacionnan di salsa, gruponan folklorico Surnameo y un trayectorio solido den musica gospel. Desde 2007 el a dedica su pasion completamente na e mundo di jazz, studiando bou guia di vocalistanan renombra manera Tica Giel, Lenora Helm y Ruth Silva. Ademas, el a sigui amplia su conocemento den teoria musical y piano cu maestro Franklin Granadillo, ritmo y percusion bou guia di maestro Carlos Bislip.
Aunke e comite organisado a ofrece un seccion di ritmo local di Venezuela pa compaña Osdelly, su repertorio ta consisti di ritmonan Arubiano, tokenan Latino y adaptacionnan Caribense cu ta exigi pa e ta compaña pa musiconan di cas mes. P’e motibo aki, Carlos Bislip a cuminsa un iniciativa pa recauda fondo for di diferente fuente pa asina cubri e gastonan pa un trio di Aruba por biaha y compañ’e durante e oportunidad unico aki.
Pa duna Aruba un bista di loke lo wordo presenta na Caracas y pa apoya e fondo di biahe, lo organisa un concierto intimo na Oranjestad. Lacroes lo presenta canticanan for di e “Great American Songbook” combina cu ritmonan Latino y Caribense, ademas di composicionnan di varios autor Arubiano. Osdelly lo ta compaña pa Kyle Winklaar, Ivan Quandus y Carlos Bislip.
Detaye di e evento
- Fecha: Diadomingo, 27 di september 2026
- Orario: 6:00 PM
- Luga: Cas di Cultura (Expo Zaal), Oranjestad
- Entrada: Afl. 35.00
Ticketnan ta obtenibel via WhatsApp na 592-6449. Tur fondo recauda lo bay directamente pa cubri e gastonan di biahe pa e musiconan Arubiano compaña Lacroes na Caracas.
Contacto pa ticket: Carlos Bislip, director, Scol di Musica Rufo Wever Email: [email protected] WhatsApp: (297) 592-6449.
