Den cuadro di un investigacion penal andando, Unidad di Traficacion y Contrabanda di Hende (UMM) a tene riba diamars 15 di September ultimo un entrada hudicial na Maxime Night Club, situa den Kruisweg den Oranjestad. UMM a ricibi asistencia di UGC (Unidad di Crimen Organisa), BFO (Bureau Financieel Onderzoek) y polis tecnico. A confisca administracion, cargadonan di informacion y un suma di placa. No a haci ningun detencion y esey tabata pa rason cu e team investigativo ta ainda analisando tur informacion cu a colecciona.
Durante e entrada hudicial a topa cu cuater (4) hende muhe posibelmente haciendo trabou di prostitucion y un trahado femenino tras di bar cu no tabatin permiso valido cu ta rekeri pa por traha. A hiba e personanan aki y siguientemente scucha pa e team investigativo di UMM. No a interoga nan como sospechoso y tampoco nan no ta deteni.
E investigacion ta dirigi riba, entre otro, posibel hechonan castigabel relaciona cu contrabanda di hende y cu pone personanan labora ilegalmente.
E investigacion ta keto bay den pleno desaroyo.
Polis ta sigui comprometi den e lucha contra traficacion di hende y contrabanda di hende y ta haci un yamada na victimanan o testigonan pa tuma contacto via tiplijn 11141.
