Durante un conferencia di prensa di AZV a keda anuncia door di e director drs. Anko Ringeling un palabracion nobo cu a yega na dje cu e Asociacion di Dokternan di Cas, y cu ta bay e forma con ta atende cu e pashentnan. E palabracion ta encera reglanan riba con nan mester haci cita cu dokternan di cas, e orarionan, etc.
Drs. Ringeling a splica cu e idea tras di e palabracion aki ta pa trece mas uniformidad den e diferente practicanan di dokternan di cas. Awor tin un variacion, cu por trece confusion, Pa e aspectonan basico lo bay tin uniformidad. Den cuadro di esaki hunto cu HAVA a traha un poster cu lo wordo colga na hospital y na oficinanan di dokter di cas.
Pa duna un miho splicacion, tabata presente den e conferencia algun dokter di cas, manera dokter Sneek, kende ta presidente di e comision cu a keda instala pa traha riba e “richtlijnen” pa atende cu pashentnan. Asina por ehempel el a bisa cu tur dokternan di cas mester tene nan mes na e reglanan basico y mescos e pashent. Pa haci cita, por yama of pasa na bali di dokter di cas (dependiendo cual di e dosnan reglanan aki e dokter ta haci uzo di dje). Na momento cu no tin mas cita, e asistente lo mester trata di saca algun informacion for di e pashent riba kico e ta sinti y cuanto dia e ta malo.
Pa casonan di emergencia, tur oficina di dokter di cas mester tin un telefon apart cual e pashentnan por yama na dje. Esaki ta pa casonan pafo di e orario durante cual por haci cita. E dokter mester ta disponibel pa e casonan di emergencia aki. Un otro regla ta cu un practica di dokter di cas mester ta accesibel pa pashentnan telefonicamente por lo menos 5 ora pa dia. Pero tambe mester tin un antwoord apparaat ora cu no tin persona disponibel pa contesta telefon pa laga mensahe. E wardanan a keda mescos den siman di 6.30 pa 10.30 di anochi y den fin di siman di 9 pa 1 y di 6 pa 10 di anochi. Tambe riba e poster tin un descripcion kico triage ta encera, esta con e casonan ta wordo atendi segun emergencia. E ta haya cu pueblo mester cuminsa acepta e sistema di triage pa tur cos por cana miho.
