E agencia di evaluacion FitchRatings ta reafirma e rating di CITGO y a adapta e perspectivanan for di uno negativo pa uno stabil. Asina a sali publica den Latin American Herald Tribune. CITGO ta doño di tres refineria di calidad halto na Merca y nan ta huur e facilidadnan na Aruba.
E rating di CITGO ta wordo manteni pa motibo di su capacidad halto di refinahe y inversionnan modesto, como tambe e accionnan di e empresa pa atende cu riesgonan di refinanciamento riba termino mediano y un clima robusto pa operadornan di refinerianan. FitchRatings ta sigui bisa cu preocupacionnan ta material pa motibo di e relacion cu ta existi cu PDVSA. Cambio di control di e empresa por resulta den default den caso cu e financiadornan no bay di acuerdo, como tambe e boluntad di inversionistanan pa refinancia debenan di CITGO pa motibo di e relacion cu PDVSA.
Hecho cu e agencia internacional di evaluacion a mantene e rating ta basa principalmente riba e hecho cu e refinanciamento cu CITGO a busca ta reduci riesgonan di likides riba termino cortico, como tambe e impacto di e sancionnan di Gobierno Mericano ta keda manehabel. Riba nivel operacional, CITGO ta keda opera su plantanan cu crudonan no-Venezolano obteni riba mercado internacional.
Gobierno di Presidente Trump ta evaluando sancionnan nobo contra Venezuela cual lo por inclui prohibicion di importacion di crudo Venezolano. Tin duda ainda si e medidanan aki lo tuma lugar, mirando cu nan lo ocasiona aumento di prijs di combustibel na Merca. FitchRatings ta kere cu e impacto directo riba CITGO lo ta modesto, mirando cu CITGO lo por haña suministro di un otro partner.
Cambio den maneho of control di un empresa cu tin financiadornan por wordo considera como un situacion di default pa cu e inversionista. Den caso cu bin un cambio den maneho of si CITGO haña un doño nobo, FitchRatings no ta duda cu e inversionistanan lo bay di acuerdo.
E hecho cu PDVSA ta propietario y beneficiario extremo di CITGO, como tambe cu tin un relacion fuerte den nan operacion, ta forma toch limitacion pa cu e rating. Sinembargo, Fitch ta indica, cu tin separacionnan importante structural y legalmente entre e dos entidadnan. CITGO ta un empresa Mericano estableci bou di leynan di estado di Delaware. E empresa tin acuerdonan di financiamento hopi estricto, cual ta impedi PDVSA di daña e calidad di credito di CITGO. E acuerdonan ta limita CITGO pa otorga garantia na empresanan afilia, ta restringi CITGO pa paga dividendonan na CITGO Holding y PDVSA, como tambe benta di propiedadnan y ceramento di fiansanan nobo. CITGO no ta para garantia of ta forma parti di acuerdonan relata na PDVSA of Citgo Holding cu ta contene condicionnan caminda cu incumplimento di un acuerdo ta nifica un incumplimento automatico di otro acuerdonan.
Den e relato, FitchRatings tambe a indica factornan cu por mehora e rating. Por ehempel, cambio di doño pa un doño cu tin mihor rating por mehora e rating di CITGO obviamente. Tambe esaki por sosode si PDVSA su rating mehora. Un separacion ainda mas fuerte y structural entre CITGO y PDVSA tambe por mehora e rating di CITGO.
