Diabierna anochi Azucar tabata pone ambiente den Casibari. Por a tuma nota di masha hopi hende gosando di e dushi musica cu Robert Maduro y Azucar a pone.
Tabata un ambiente super dushi, gezellig y den famia. Azucar a bin cu su musica varia unda cu tur hende a lora pia.
Normalmente Robert Maduro ta den ambiente tipico y crioyo. Azucar ta toca tur cos. Esey ta exigi cu ora ta toca pa cierto publico, mester ta varia cu cierto tipo di genero. Azucar tambe ta toca crioyo, como tambe tumba. Fuera di e merengue, salsa, vallenato, reague y hasta rock. En fin tur loke ta den nan alcance pa toca pa pone hende disfruta.
Robert Maduro mes tin 42 aña den musica. A pesar di su edad, e ta considera su mes jong y ta biba cu e ambiente cu Azucar ta pone.
Azucar mes tin tres aña di existencia. Ta un banda cu a lanta net prome cu e pandemia. E ta un banda pa pasa bon (Entertainment band). Nan ta toca diferente caminda y danki na Dios cu desde prome instante cu a lanta, e aceptacion tabata bon y nan tin nan fanaticonan cu ta sigui nan na varios di nan fiestanan.
Nan tin un bon fanaticada cu ta duna nan sosten. Azucar ta traha duro pa tin un repertorio up-to-date y pa pone hende gosa.
