Diadomingo a tuma luga un caravana, p’asina demostra adoracion di Dios. E proposito tabata pa pasa rond den varios caya na Aruba, declarando palabra di prosperidad, di restitucion, di sanidad y pidi Dios pa semper tin Aruba den su man y proteha nos den tur momento.
E caravana di adoracion aki a sali fo’i Hooiberg 81 pa 2:00 pm y yega bek n’e Iglesia y pasa den varios caya entre otro Modanza, Paradera, Casibari, Piedra Plat, Cumana y Rooi Afo.
Intencion tabata pa hunto manera un famia, manera ruman gosa den presencia di E creador haciendo lo cual ta custumbra di haci den iglesia pero e biaha aki riba caminda.
Iglesia Cunucu di Dios a considera cu e caravana aki tabata uno exitoso y e anhelo ta pa sigui cu e tradicion di haci e evento nan aki y pa pueblo di Aruba uni p’asina logra un nacion cu ta adora Señor, un accion di gradicimento pa tur locual cu Dios ta haci y duna nos.
