Core auto sin rijbewijs ta castigable pa ley. E por hasta costabo bo libertad. Esey ta netamente loke a sosode tambe dialuna atardi den De La Sallestraat. Polis di Playa a para un auto pa control. Durante e control a resulta cu e chauffeur no tabata tin rijbewijs. E auto ta un Honda CRV color berde.
Hopi biaha Polis ta djis duna multa y laga e chauffeur na pia. Awendia mirando e cantidad di chauffeur cu ta subi caminda sin rijbewijs, ta pone cu Polis ta actuando cu man mas duro. Diariamente ta topa cu accidentenan caminda hendenan no tin rijbewijs. Pesey mes den mayoria control ta detene esnan cu ta core sin rijbewijs. Ora di accidente mescos. Algun dia pasa den un solo accidente dos chauffeur a keda deteni pasobra nan no tabata tin rijbewijs. Esaki mester ta un señal pa tur otro chauffeur cu ta subi caya mientras cu nan sa cu nan no tin rijbewijs.
