Cosoma (Commercial Social Market) ta un proyecto grandi pa Fundacion nos Comunidad y tambe pa e hobennan di Pitch Time. Segun Junaika v/d Biezen, presidente, e fundacion a wordo funda pa duna sosten na famianan den necesidad ya pa 10 aña, unda cu nan ta haya ayudo di pakete basico di cuminda, pero tambe den paña, articulonan di cas y diferente otro cos mas.
E fundacion a bin di ta poniendo un trayecto pa clientenan, unda cu a crea un “commercial social market” cu ta Cosoma. Mirando cu e tabata un exito kier a trece esaki tambe na San Nicolas. Ora cu a haya e oportunidad pa haci e proyecto aki posibel, a traha duro riba dje hunto cu Youth Coach y e team, pa haci esaki posibel.
No tabata facil. Tabata tin diferente obstaculo, pero a sa di sobrepasa tur esaki y hacie un realidad. Awo Cosoma na San Nicolas ta un realidad y cu un bunita edificio, unda cu e hobennan a duna hopi tempo di nan mes y cu hopi creatividad, pa haci esaki posibel.
Commercial Social Market no ta pa clientenan so, sino pa henter pueblo di Aruba y esaki ta haci e proyecto aki uno hopi bunita.
Nan ta gradici WEB cu a kere den e proyecto y a scoge e fundacion, cu por a realisa esaki den un corto tempo. Tampoco no mester lubida e Youth Coach cu a sa di guia na e team di hobennan cu a traha riba e proyecto aki. Nan a duna di nan banda ora cu tabata por, cual tabata hopi bunita di presencia y ainda por mira nan gana y entusiasmo den e fundacion, haciendo e proyecto aki uno special.
Kico por spera di Cosoma
Cosoma ta brinda productonan na un prijs rasonabel. Tin biaha cosnan segunda mano, pero tambe nobo. E ta pa cliente pero tambe pa pueblo di Aruba. Aki tambe tin un skina cu ta reparti nan paketenan di luna, pero tambe ta reparti pan, cu ta pa e clientenan.
Ta amplia e servicionan cu e clientenan no mester bay te pabao di brug, pero asina ta aporta tambe pa yuda e clientenan p’ariba di brug.
Fundacion Pa nos Comunidad tin cliente p’ariba di brug, pero e distancia ta basta largo y cu esaki, ta facilita nan pa yega na Cosoma San Nicolas.
Pitch Time
E hobennan di Pitch Time di Cede Aruba a scoge e proyecto aki y tambe colabora pa por gana e competencia unda cu un di e companianan participante ta sponser e proyecto. Y den e caso aki e tabata WEB.
Awor aki nan ta enfoca riba Playa y San Nicolas. Pero si tin un localidad cu por facilita e clientenan pa por yega mas lihe na dje, semper e ta bon. Aruba toch ta chikito, pero cu e trafico awendia, e ta bon pa tin mas na diferente luga. Pero pa awo nan ta keda na Playa y San Nicolas.
