Awe dia 20 di december ta deadline pa Gobierno di Aruba dicidi pa duna WEB instruccion y aproba e “Hedging” pa e prome kwartaal di aña 2018, asina un fuente den top di nos compania nacional di produccion di awa y coriente a divulga na nos. Pa nan ta sorprende e situacion, pasobra e mesun MEP tabata tur tempo contra e formula aki di seguro, den cual ta paga un suma fiho pa combustibel, no obstante cu tarifa mundial subi of baha.

Manera ta conoci, e contract di “Hedging” cu WEB tin actualmente ta na vigor te dia 31 di december 2017. Entrante dia 1 di januari 2018 mester sea cumpra na prijs di mercado mundial of sigura e prijs por medio di e formula conoci como “hedging”. Ultimo biaha e director saliente di WEB a sigura e tarifa pa 2 aña, locual no a cay den bon tera cerca Gobierno.

Hedging ta un seguro, pues e ta trece cune bentaha y desbentaha. Si e prijs baha drasticamente, e no ta cumbini WEB, pero si den e periodo e subi hopi, e ora e lo cumbini WEB y lo ta den desbentaha di e banco internacional cu ta sigura e tarifa.

Politicamente lo ta masha dificil pa partido MEP, cu e ultimo añanan a critica e maneho di Mike de Meza cu a permiti WEB pa sigura cu e tarifa di awa y coriente ta keda stabiel y intacto, pa awor tambe aplica e mesun maneho. Pero lo contrario, si stop di hedge, e ora e prijs di awa y coriente lo fluctua tur luna, segun e prijs fluctua na nivel internacional.

Comments

comments