Hues no ta compronde e accion di presidente di parlamento contra Speed Andrade

Pa mas of menos 3’or a drenta e decision di corte den e caso sumario cu Nelson Andrade a entama contra gobierno di Aruba y/of Parlamento di Aruba pa un decision cu Parlamento a tuma pa prohibi pa drenta e facilidadnan, edificio di Parlamento durante tres luna largo como sancion, castigo, medida disciplnario, pasobra el a critica e presidente di parlamento y/of su maneho durante un noticiero na radio, na canal 90, y e ora el a dicidi cu no mag di drenta e edificio di Parlamento.
Abogado David Kock tabata den corte, den e caso sumario y el a splica cu awe sentencia a cay, den 24 ora di tempo. El a splica cu e ta sumamente contento cu e veredicto aki. Si les’e precies, no solamente tabata bisa, sino loke a demanda y spera despues di tratamento di ayera. Ta importante pasobra e caso aki tambe ta trata hopi di principio, principio di ley. Te unda autoridad di presidente di parlamento ta bay. Kico ta su bevoegdheden nan y ki limitacion ta pone riba un persona, sea un ciudadano comun y coriente, pero specialmente y a dedica un parti na esey, na ora ta trata di un periodista, caminda cu e ta bisa cu periodistanan mester ta esun cu ta molestia. Tin cu ta molestia mas cu otro. Y no ta pesey mester tuma e accion asina contra dje.

Interpretacion riba reglamento di ordo
Ta sumamente importante e puntonan huridico. Mester haci distincion hopi entre regla y sancion. Ley cu ta conta pa tur hende, tambe pa parlamento, e presidente di parlamento ta bisa cu e por pone regla na hendenan cu ta bishita parlamento. Esta con nan ta bin bisti, kico nan mag di haci ora nan ta eynan. Pero e no ta bay asina leu di duna un prohibicion y un prohibicion den sentido di manera straf y prome cu algo sosode. Loke cu sr. Andrade a haya ta un straf preventivo, pasobra e ta kere cu e no lo bay cumpli cu cierto reglanan. E regla mes cu e tambe kier a pone hasta, cu prome algo mester pasa mester tin openbare orde cu ta wordo neglisha door di e persona cu ta den staten pa ora e por sak’e. Pero e no por saca e persona di antemano. Ta un clarifacion hopi importante. Den nos regionnan, e leynan cu ta wordo traha aki, no tin mucho pa val terug riba dje di bay busca kico tabata e splicacion, kico ta e limitacion. Esaki e limitacion a wordo hopi bon y skerpi poni.

Periodismo a gana
Periodismo a gana awe y hues ta bisa esey tambe. Si e prohibicion cu tabata tey lo a keda riba mesa, esey lo tabata un desaroyo peligroso cu ta algo no lo kier na Aruba cu libertad di prensa. Ta contento no solamente pa e cliente, e como persona, pero tambe como miembro di prensa y pa e otro miembronan di prensa aki na Aruba.

Apela
Abogado Kock a splica cu por ehecuta e accion inmediatamente. E ta aplicabel ya. Dentro di 24 ora tin cu beteken. Ya ta bezig cu e Deurwaarder caba pa regla e betekenis. Aunke cu nan apela, nan tin cu cumpli cu e veredicto. Naturalmente Kock no ta hues, ni hof, pero no ta kere cu tin mucho pa cambia den un setencia aki si pensa pa bay apel’e.

Hues no ta compronde
E motibo di e caso aki pa hues tabata uno cu e no tabata compronde. Segun Kock, e hues tabata busca e motibo for di e presidente di parlamento dicon el a yega na e accion aki, cual ta bay sumamente leu. Pero di dos tambe e tabata purba di lok uit pa e presidente bin bisa a base di kico e tin cierto autoridad. Ningun di dos eigenlijk por a bin un clarificacion riba dje, si na final por a compronde cu esaki tabata algo completamente personal, pasobra e presidente a bisa cu door di e uitlatingnan cu sr. Andrade a haci den su programa na radio cu esey tabata un menasa, cual el a ripiti den varios ocasion despues di e caso. Hues a bisa bon cla cu esaki no ta ningun tipo di menasa, ningun sorto di insulto y e bevoegdheid e no tabata tin. Pa cosnan cu ta pasa den ambito pafo di staten, no tin ningun sorto di autoridad pa miembronan di staten tuma algun forma di medida contra personanan den nos sociedad.