Riba 28 di october 1995 (25 aña pasa), un diasabra atardi laat, “Officier van Dienst”, ing. Jaime Lacle tabata sinta riba un cero. Rond di 6’or di atardi su “pager” a cuminsa zona. Señal di algo grandi. Esey tabata e caso. E tabata un di e candelanan di mas grandi den historia di Aruba. E candela cu a caba cu Club Visage, Pizza Pub, Codemsa, Patio, Certified Supermarket y a menasa Master Cargo. A tuma bomberonan por lo menos 24 ora pa por a caba di combati e candela!
Club Visage tabata e club nocturno mas popular den mundo di diberticion na Aruba. Ron von Kaenel a haya permiso pa traha e club aki na 1985 y a habrie na 1986. E club aki tabata atrae hoben y adultonan. Situa na un punto strategico riba boulevard, dilanti unda antes tabata Bushiri Hotel, e tabata atrae un multitud grandi, entre local y turistanan. Fin di simannan tabata dificil pa haya chens pa drenta.
Un total di 4 negoshi a keda destrui y dos otro mas afecta. Un dia cu e generacion cu a nace prome cu decada ’90 no lo lubida. Un sucedido cu si bay analisa e situacion awe, 25 aña despues, Aruba no a avansa riba e aspecto di siguridad.
“Visage ta na candela,” ta e mensahe cu ing. Jaime Lacle a ricibi na momento cu el a puntra riba portofon kico ta pasando. “Na momento cu mi a yega na e sitio, a haya dos tankwagen para na e sitio, hopi huma preto y bomberonan para pafo sin por haci nada”. A resulta cu tabatin muebles poni dilanti di e portanan y no por a drenta paden.
A dicidi di trata di bay wak si por drenta via di e cushina y aki a bin descubri un problema grandi. E tubo di gas ta un PVC fini cu cualkier momento por kibra, ya cu e tabata smelt caba. A trata di basha awa riba dje pa gana tempo. E situacion tabata hopi dificil pa nan, ya cu mester a traha cu poco personal y ekiponan tampoco tabata suficiente pa e candela inmenso aki.
Jaime Lacle ta corda di a drenta Certified Supermarket y a haya cliente haciendo compras normal y e Chines sinta na caha atendiendo cliente. “Mi a core drenta paden y a bisa e propietario saca tur hende afo, tin candela.” Tabatin un cantidad grandi di productonan flamabel eyden. “Pa colmo ora di cera e supermercado, e doño a baha e luik y a dal e luga cera, locual e no mester a haci. Mi a mira Certified kima den dos pa tres minuut. E candela a drenta di un banda y a sali di otro banda y a bay kima Codemsa.”
E tempo ey Coastal a manda un truck y a bisa “awa so nos mester y ta paga e candela den dos ora.” Esaki sinembargo no a sosode, ya cu e situacion ta hopi mas grandi y dificil di loke a pensa inicialmente.
Causa di e candela no a logra saca afo. “Loke nos sa ta cu e candela a cuminsa den e cushina. Pero tabatin cosnan straño, ya cu e portanan tur tabatin muebles nan dilanti cu a stroba e bomberonan di por a avansa. For di dilanti so por a drenta, pero tabata peligroso pa pasa den e gang pa yega te patras.” Pa Jaime Lacle, pa loke ta grandura, e tabata esun di mas grandi, cu el a yega di pasa aden. Ta papia di un daño total di como 50 miyon florin y cu a laga como 200 hende sin trabou, e tempo ey.
Mirando atras, ing. Jaime Lacle por bisa cu ey ta caminda e proceso a cuminsa pa haya mas vehiculo pa combati candela. A logra haya dos vehiculo inicialmente, hunto cu mas personal y despues a haya shete truck mas. Sinembargo loke no a mira mehoracion, ta e medidanan di siguridad pa evita candelanan di e tipo aki. Tin hopi conseho cu nan ta duna. Tin un Brandweerverordening, cu su ley, pero lamentablemente no tin sancion poni concreto pa violacionnan. P’esey Bombero por duna unicamente conseho di ki medidanan di siguridad por tuma. Pero si un persona no cumpli, nada no ta pasa. E ta conseha pa mara esaki na e permiso di construccion, unda cu tur e sancionnan ta mara na e ley.
Jaime Lacle a bisa cu e no sa pensa mas riba e candela ey. Por lo menos e no a impacta su bida. “Esun cu si ainda mi sa pensa riba dje ta mi prome accidente di auto cu mi a atende durante mi estudio na Hulanda, na aña 1990. Mi a haya haya ayudo profesional e tempo ey, pero esey si ainda mi sa pensa riba dje, pero Visage no”.
