“E situacion na Venezuela ta sigui empeora dia pa dia y Aruba ta confronta cu hopi reto di hendenan cu ta trata di drenta nos isla via costanan pa permanece ilegal, cu tur consecuencia cu esaki ta trece cune”, asina Parlamentario Robert Candelaria di e Fraccion di AVP den Parlamento a duna di conoce. E ta preocupa pasobra no ta nota cu Minister di Husticia ta ‘garando e toro na su cacho’.
Durante campaña electoral, tanto e partido MEP como POR a subraya e necesidad pa un radar independiente pa Aruba so. Manera ta conoci, Aruba tin radar, pero maneha pa Marina Real y Warda Costa di Caribe Hulandes. Partido MEP ta sinti cu si nos tin nos mesun radar, maneha pa Polis of pa Warda nos Costa, cu esey lo funciona mas eficiente y sigur. Mesun cos e tempo aya a propaganda cu lo bin atrobe cu un Helicopter pa husticia.
E situacion en berdad ta un situacion hopi delicado y serio, cu ta rekeri un maneho mucho mas directo y estricto di parti di gobierno, principalmente di Minister di Husticia Andin Bikker, cu ta responsabel pa introduci un maneho y medidanan cu realmente ta efectivo contra di e desaroyonan aki cu tin tur hende preocupa, di acuerdo cu e Parlamentario.
“Ta masha bunita pa Minister di Husticia festeha na grandi cu el a pone WIFI den Warda di Polis, celebrando reapertura di un Post di Polis di Bario….pero un plan real, un plan concreto di loke e ta bay haci den su maneho, ainda no por mira ningun caminda”, segun Parlamentario Robert Candelaria.
Robert Candelaria ta lamenta cu e mesun Minister aki tempo e tabata den oposicion, a sigura di tin e solucion, cu e tin un plan efectivo pa combati criminalidad, hasta a exigi retiro di e Minister di Husticia anterior, sinembargo despues di casi 10 luna como Minister, no a mira e plan aki bin dilanti of presenta na pueblo pa tur hende por sinti cu ta haciendo cosnan concreto.
Robert Candelaria: “Papia ta uno y haci ta otro cos”.
“Na e momentonan aki mester evalua unda e sapato ta primi mas duro den husticia, na unda e problema mas grandi ta sinta pa loke ta siguridad di nos pais y mi ta kere cu esaki ta e situacion di ilegalidad”, di acuerdo cu e miembro di Parlamento, kende ta bin cu un amplio experencia den maneho, como Inspector di Polis y como ehecutivo den sector priva.
Aki no ta trata di solamente cu e hende ta huy pasobra cu no tin placa y cuminda pero tambe tin hendenan cu ta purba drenta pa bin cu droga, cu arma pisa, pa trece hendenan cu tin mal intencion, pero ta cosnan cu den pasado a yega di pasa pero awor e riesgonan ta birando mas grandi. Awor mester evalua unda ta baha e cantidad di personal den servicio pa nos siguridad, pa aumenta unda mas ta necesario.
Kustsurveillance ta un bon ehempel, maneha den pasado pa Polis, Duana y Warda Costa hunto, ta algo cu mi a experencia, bo tin tres servicio cu tin diferencia den nan autoridad legal, pero trahando como team, ta un mokete mucho mas fuerte cu por dal cune. No solamente pa e hecho cu tin mas hende envolvi pero e opcionnan legal ta aumenta e accion mesora.
“Un radar sigur ta importante y efectivo pero esaki ta hopi caro pero di otro banda ora cu nos mira cu Gobierno a aumenta su gastonan cu 130 miyon di florin y di e placa aki no tin nada pa pone un radar aworaki mirando e situacion cu nos isla ta wordo confronta cune cu e situacion na Venezuela, e ora ta bisto cu e Gobierno aki tin su prioridadnan robes”.
Pa resumi mi tin cu bisa cu aworaki alocacion di personal mester ta concentra riba nos costa, e alocacion di placa di nos finansa mester ta concentra y dirigi pa pone un radar nobo y intensificacion di mas cooperacion entre diferente departamento”, asina Parlamentario Robert Candelaria a termina bisando.
