E boto di placer cu tawata involucra den e tragedia riba lama, no a cumpli cu e
documentonan oficial cu ta rekeri pa un boto por sali di un forma legal for di Venezuela.
Na momento cu e boto aki a jega Aruba e tabata den posecion di un zarpe falso
(vertrekdocument di Venezuela). Autoridadnan na Aruba a constata cu e boto en cuestion
tabatin documento falsica (valsheid in geschrift) y a pone ministerio publico na altura.
Ministerio publico a pone na prome instante cu un multa mester wordo paga, sinembargo
mirando cu e capitan no tabatin e medionan financiero a dicidi e ora cu lo manda e boto
bek pa su punto di origen y no a permiti’e ‘klaar in’.
Prome cu e boto a sali for di Aruba Directie Scheepvaart Aruba a revisa si e boto ta apto
pa nabega. Den revision a constata cu e boto tabata cumpli cu tur e exigencianan entre
otro: suficiente combustibel, salbabida, suficiente awa y comestibel.
Na su turno Kustwacht a compaña e boto y su tripulantenan te ora nan a sali for di e awa
territorial di Aruba. Esaki ta un proceso cu Kustwacht ta haci na tur ocacion, pa sigura cu
e boto a sali for di nos awa territorial den un forma responsabel. Despues cu e boto a pasa
e awa territorial di Aruba nos autoridadnan NO ta responsabel mas pa loke por pasa.
Pais Aruba ta lamenta e tragedia aki y ta convivi cu e famianan di e victimanan.
Palabranan di profundo condolencia y hopi forsa den e momentonan dicifil aki na e famia
di e fayecidonan.
