Autobus: Hopi ta esnan cu no ta tene nan mes na regla di bisti mondkapje

1346

Coronavirus ta preocupacion principal despues di desempleo riba nos isla na e momentonan aki. Relaciona cu esaki team di 24ora a sali riba caya pa haya un poco di e sentimento di e comunidad riba e topico aki.

A combersa cu Albert Cornelies Angela kende ta chauffeur di autobus number 19 riba e situacion y kico su persona lo a haci diferente pa combati e pandemia si en acaso e lo tabata forma parti di e task team actual.

Angela ta menciona cu na prome luga e lo a apunta un luga special pa personanan cu ta afecta / contagia cu coronavirus y lo mester ta den cuarentena, mirando cu na e momentonan aki hopi ta esnan cu no ta atene nan mes na reglanan stipula na nan cas. Nan ta desvia for di regla y situacion ta bay for di man. Lo tabata na su luga pa gobierno a apunta un luga special.

Retonan ta presente, cantidad di pasaheronan a baha hopi compara cu antes y sigur a haci su efecto. Ta algo diario cu mester hala atencion di e pasaheronan manera ta mucha chikito nan ta, hendenan grandi cu mester tabata sa miho cu e situacion ta serio, riba reglanan y riba e peticion di bisti mondkapje. E ta bira un situacion di stress enorme riba nan paso no solamente nan tin cu cuida nan mes pero tambe salud di e pasaheronan.

Segundo punto ta e control. Albert ta di opinion pa e protocol funciona, e control tambe mester tey, tanto bus como e pasaheronan si nan ta cumpli cu medidanan stipula. Ta comprendibel cu e mondkapje ta un incomodidad, pero no por ta asina cu manera nan sinta ta baha esaki den e bus. Mester recorda nan tur dia cu tin cu bisti mondkapje prome cu subi e bus mes.

Di otro banda e ta menciona si cu tin algun hende hopi disciplina cu si ta tene nan mes na regla mientras otronan ta warda te ora e bus para pa e ora nan bay busca den tas na unda e mondkapje ta hinca, cu ta causa tardansa y hopi stress pa e chauffeurnan di bus.

Pa locual ta trata e fluho di pasahero, esey ta algo cu a baha drasticamente cu ta nifica cu nan mester pone mas ora pa tene cabes riba awa. Tambe mester baha gastonan personal pa asina sobrevivi. Ta hinca hopi ora di trabou pa logra wanta pero ta causa un stress enorme riba nan. Local ta boga si ta e ayudo di gobierno mirando cu nan no ta haya subsidio, ayudo cu belasting riba number di auto, fuel, seguro mas barata cu ta e factornan cu mas ta afectanan awo akinan y eski ta e pueblo tin cu page y nan ta den momentonan bastante dificil caba.

Albert ta apela na Gobierno pa mantene e tarifa cu ta uno social pasobra ta e pueblo ta esun cu tin cu page na final di dia. Situacion di taxi (transporte) pirata lamentablemente ta lanta cabes pasobra situacion ta difici pero departamentonan cu no ta controla ta haci e situacion mas dificil. Bo ta yama un DTP cu ta manda bo yama polis y viseversa. Si tin control lo yuda e situacion pasobra actualmente falta hopi hende capacita den e departamento.