Docente di gym contagia: A cera henter Prinses Amalia Basisschool

Den un comunicado na tur mayor di alumnonan di Prinses Amalia Basisschool, directiva di scol ta anuncia cu lastimamente cu a conoce un caso mas di Covid-19 na e scol. Den e caso aki ta trata di e maestro di Movecion y Salud, kende a haci test pa Covid-19 y a sali positivo.

Pa motibo di esaki mirando e situacion di e desaroyo di Covid-19 na e scol, Crisisteam/DBZ/JGZ a dicidi pa cera Prinses Amalia Basisschool desde dia 17 di september y cu tur alumno di Prinses Amalia Basisschool tin di bay den cuarentena preventivo, siguiendo e protocol di DVG pa cuarentena na scol.Maneho di scol, DPS ta na altura di e decision aki.

Dia 28 di september e scol lo habri su portanan bek. Lo informa e mayornan despues con lo habri: si ta cu 50% of cu 100% di e alumnonan na scol. Den e dianan cu ta bin lo sigui desinfecta e edificoii completo y sigui tur paso di DVG Protocol pa asina e scol por ta cla pa ricibi su alumnonan atrobe.

Den e periodo cu e edificio ta cera, lo haci un maximo esfuerso pa sigui duna les na e muchanan. Lo bay duna les online y lo manda un pakete (y/of buki) cas. Mayornan lo bay ricibi mas informacion den cuadro di esaki mas durante dia.

Scol ta lamenta hopi cu un colega mas a sali positivo y cu mayornan kisas ta (mas) preocupa awo. Ta spera cu tur cos lo sigui bon pa cada un di e muchanan y si un yiu bira malo of lo a test positivo, ta keda hopi importante pa informa scol mas lihe posibel.