Un tiki promer cu 5’or di atardi, doño di cas Rooi Taki 4 a haya susto di su bida ora el a tende un sonido masha duro afo di su cas.
E sonido a bin door di un auto Suzuki Liana cu a slip for di e caminda di santo y a dal den cura di e cas bash’e abou. Ambulance a wordo pidi pa bini, ya cu ambos persona den auto a resulta herida. Aki ta trata di un mama cu yiu cu segun nan un auto desconoci tabata core riba nan banda di caminda y p’esey el a hala y perde control. E otro auto no tabata na e sitio pero mirando e rastro di brake den e caminda di santo y e daño cu e auto y cura a haya, por deduci cu velocidad halto sigur tambe a hunga un rol.
Ambos persona a wordo trata den ambulance pa despues wordo hiba pa hospital. Door cu e chauffeur y pasahero tabata tin nan safetybelts bisti, e daño fisico a keda limita. Asina mes nan tabata keha di lomba y tambe cu e safetybelt den e impacto a laga nan cuero kima formal. Takelwagen mester a bini pa kita e auto for di cura.
