Dialuna mainra tabata tin lansamento di e Plan Nacional di Prevencion den Salud den presencia di Organisacion Mundial di Salud, Panamerican Health Organisacion y demas stakeholdernan den salud durante un ceremonia cu a tuma luga den e ballroom di Marriott dialuna mainta.
Como minister di Salud Publico, Dangui Oduber a splica cu ta un plan cu nan a pone den nan plan di gobernacion, considerando e hecho cu nos comunidad no ta e pais di mas saludabel.Si mira e investigacion cu a wordo haci na 2017, e resultado cu esaki a duna ta cu por ehempel 16% di nos poblacion ta sufri di diabetes. Mundialmente e indice ta 8%. Na e momentonan aki tin mas of menos 200 pashent ta dialisa.
Cada pashent cu ta dialisa ta costa fondo di AZV 100 mil florin pa pashent. Ta papiando aki di 20 miyon florin solamente na dialyse. Un 70% di nos poblacion ta sobrepeso di cual 30% ta obeso. Tur esakinan tabata motibo cu keda sin haci nada no ta un opcion. Ta p’esey a pone den e programa di gobernacion cu kier desaroya un plan nacional di prevencion, caminda cu ta bay cuminsa conscientisa y tuma accionnan pa loke ta salud di nos comunidad, pa asina tin un comunidad mas saludabel, pa garantisa e sostenibilidad di e fondo di AZV.E plan aki a wordo desaroya cu tur stakeholder na Aruba, manera Departamento di Salud Publico, Imsan, hospital AZV, Wit Gele Kruis, HAVA.
A wordo asisti pa Panamerican Health Organisation y World Health Organisation, cu tabata t’ey presente pa e lansamento oficial di e Plan Nacional di Prevencion. E plan nacional aki tin un duracion di 10 aña, cual ehecusion lo ta den 2020 y ta bay te cu 2030. A scoge esaki pasobra e plan no ta di un partido politico.No ta solamente di un gobierno sino un plan integral caminda tur stakeholder na Aruba, den cuido medico a participa activamente a duna nan contribucion cu awe por a realisa e lasamento oficial.Ta algo grandi pa pais Aruba. E ta un di e prome paisnan den Caribe cu tin un plan nacional di prevencion. Y asina aki no solamente ta cumpli cu e programa di gobernacion, sino a cuminsa caba pa ehecuta e plan aki pa tin un comunidad mas saludabel, pa conscientisa comunidad kico ta consecuencianan di hiba un bida no saludabel, kico ta e consecuencia pa no participa na actividadnan fisico.
Si mira e tendencia cu tin, e comunidad ta birando mas insaludabel y esaki ta un cambio di mentalidad. Ta un cambio di estilo di bida cu kier cuminsa inverti aden. Gobierno tambe ta bay bin cu un fundacion nacional di prevencion, cu lo yuda ehecuta e plan aki, hunto cu Departamento di Salud Publico, hunto cu AZV y hunto cu tur e stakeholdernan,minister di Salud Publico Dangui Oduber a bisa. Meta final ta pa mira resultado A lansa e plan awe y despues di dos aña lo evalua e plan aki ki resultado el a duna, si tin cu haci ahuste. Na final di dia, ora e plan aki duna resultado, tin un comunidad cu ta mas saludabel, tin un comunidad cu ta mas productivo, tin un economia cu ta florece y ta baha e gastonan di AZV y mantene sostenibel.Na e momentonan aki e gastonan di AZV ta riba 453 miyon florin y e indicacion ta cu tin un poblacion cu ta birando mas bieu. Tin hopi mas hende grandi den nos poblacion.
Tur esaki ta motibonan importante pakico un plan nacional di prevencion ta asina importante, asina esencial pa e comunidad di Aruba pa cuminsa na un manera mas agresivo den conscientisa nos comunidad pakico cuida bo mes.E ser humano tin su propio salud den su man. Ta keda na cada ciudadano kico e ta consumi, kico e ta come. Si e ta come hopi salo, hopi sucu, si e ta haci ehercico, kico e ta come durante dia.Por medio di e plan aki, na un manera hopi agresivo, ta bay cuminsa cu diferente campaña di conscientisacion pa nos comunidad tin un bida mas saludabel, cual na e momentonan aki esey no ta e caso. Ta pesey e lansamento aki tabata asina importante den presencia di PAHO, WHO y tur e stakeholdernan.
