Un accidente basta serio a keda registra diadomingo mainta. A drenta informacion cu auto a dal y bolter dilanti di De La Salle College na Playa. Ora cu Polis a yega a topa cu un persona herida.
E tabata chauffeur di e Ford Escape color preto A-9559. E tabata bayendo direccion pabou y net dilanti di e scol cu velocidad halto a dal den e berm cu tin mey mey di caminda. El a ranca borchi. Djey dal den un Kia Sportage color shinishi y bolter.
E señora den e Sportage tabata na caminda pa misa y el a sinti un sla na e auto y ta mira con e Ford Escape ta bolter. Djey el a mira tambe con tres homber a sali core bay.
E chauffeur so a keda. Segun e tata di e chauffeur cu a presenta, su yiu a pega soño. El a duna tres persona lift y nan a somenta. Asina bon amigo nan no por ta sino nan lo a para. E tata a splica cu su yiu tabata bayendo training pasobra e ta preparando pa competi afo. Na caminda el a pega soño cu tur consecuencia.
Ambulance a presenta y atende cu e chauffeur hoben. E Ford Escape ta di su mama y e mama a bay afo den competencia di Deporte y a laga e yiu cu e auto. Awor cu e mama bolbe e lo tin cu cana na pia pasobra e auto no ta sirbi mas. Cu takelwagen mester a bolter e auto bek. E tata a papia tambe cu e señora di e Sportage cu a conta tambe ki tur el a mira.
