Precisamente riba un diasabra atardi, ora cu e Clean Wheels Carwash & More ta yen di cliente cu ta bay eynan pa laba nan auto, a bin haya nan cu un situacion inusual. Un tipo hoben a dicidi di draai auto den e santo dilanti Bochincha Container Yard y yena e carwash y CITGO Boulevard cu stof. Algo cu nan no a aprecia pasobra, separa cu e ta un molester inecesario, e ta stroba nan negoshi di laba auto tambe. A yama polis mesora prome cu nan mes tuma ley den nan man!
Asina un patruya a yega mesora na e sitio, pa 5:10pm y eynan a topa cu e auto marca Mazda modelo CX-5 color blauw scur, numera A-37474. Testigonan a splica autoridad cu e auto en cuestion tabatin un mucha homber jong cu un flanel preto bisti ta draai y traha ronchi den e santo eydilanti. El a causa masha molester y ora cu e trahadonan tabata haci señal cu ne pa e stop, el a mustra claramente di no ta worry y a sigui.
Ta resulta cu e auto ta registra riba nomber di ex-parlamentario, actual coordinador di minister di asuntonan social y labor, esta Sue-Ann Ras, biba na Savaneta. Hecho ta cu no ta e consehero di gobierno tabata na stuur di su auto sino un otro persona, cu probablemente e lo a confia cu su propiedad pero cu no por comporta of no ta tene cuenta cu e balor di su auto of di su funcion den comunidad. E ta fastioso pa polis mester atende un ex-parlamentario riba su comportacion den trafico, specialmente si e ta bin for di enseñansa. Pero, den e caso aki ta un hende cu mag stuur su auto a abusa di e confiansa.
Polis a atende cu e tipo aki na un forma duro y el a mustra comprension mesora. E defensornan di ley a tah’e cu si nan mester bin un biaha mas pa su drifting riba caminda di santo, cu nan lo tuma e auto den beslag y e lo keda na pia. El a priminti di no draai auto mas eybanda.
Claro cu trahadonan di e carwash no tabatin mucho palabra di aprecio pa e homber aki tampoco, pasobra despues di tur nan trabou, esfuerso y dedicacion, a haya nan ta laba algun di e autonan eynan di nobo. Pasobra nan lo no por bay hustifica cu e clientenan cu auto di un ex-parlamentario a yena tur e autonan laba cu stof. Pues, a haya nan ta laba e autonan pa un di dos biaha, mientras cu e clientenan a paga un solo biaha pa laba auto.
