Un caso basta serio a tuma luga awe mainta na momento cu tres persona a presenta na un cas na Pos Abou cu intencion di comete un atraco of ladronicia. A bati alarma y mesora polis a presenta pa atende cu e situacion.
Segun por a compronde, tres hende homber a sali na careda for di un cas y subi un vehiculo cu tabata staciona na e skina di e caya. A indica cu un persona den e apartamento parti patras tambe a bati alarma na momento cu a sinti hende ta cana y reboltia den e cas.
Mesora a inicia un buskeda na diferente area. Unidad di Playa, Noord como tambe K9 tabata riba diferente ruta. Na altura di rotonde di Ponton a señala e vehiculo. A cuminsa un persecucion formal for di eynan, drenta Kamerling Onnehstraat sali riba De La Sallestraat caminda el a bay dal contra un otro vehiculo y sigui core.
Polis tabata su tras y a sigui direccion zuid, a yega rotonde di Banco di Caribe y aki e vehiculo a bira subi veld di cricket cu intencion di sconde e vehiculo. Un di nan a baha na careda y bay direccion ex-Kooyman na Dakota. A logra detene un di e sospechosonan na e veld di cricket y e otro riba Awacatistraat. Takelwagen a transporta e vehiculo cu lo ta parti di e investigacion contra nan.
Accion rapido di polis tabata e rol principal den logra gara e malhechornan aki cu a hiba na detencion relampago.
