Diamars anochi pa 10:15pm a bati alarma pa un otro atraco arma, e biaha aki den curason di Santa Cruz. Dos homber color cla, delega y cu arma di candela den man a drenta den Banana’s Rowiginis na Santa Cruz, bula tras di bar y bay cu tur placa cu nan a haya den e “cash register”. Ora caba nan a baha na awa na pia, direccion Papilon.
Mesora a manda varios patruya di Polis pa e sitio. A cuminsa busca activamente den vecindario. E hombernan ta bisti cu jeans y un di man cu T-Shirt scur y e otro cu T-Shirt strepia preto cu blanco. Nan a papia Papiamento durante e atraco arma. Nan tabatin lenso na cara, pero den intento pa huy, un di nan a laga lenso cay y a keda den Banana’s Rowiginis.
E “modus operandi” aki ta identico na e atraco awe marduga na Rey Hing Bar & Restaurant na Pos Chikito. Ta sospecha cu por ta e mesun atracadonan cu ta bishitando negoshinan den ora di anochi.
Polis ta investigando e caso, pero si Bo por tin mas informacion, yama 111-41 y laga bo tip den forma anonimo.
