ATIA a tuma nota cu den un conferencia di prensa recien di gobierno cu stakeholders, entre otro WEB, a yega na un punto/acuerdo cu den Augustus 2018 e promer barco cu HFO cu considerablemente menos sulphur lo yega Aruba y cu esaki implementa e plan pa immediatamente trata na mengua e molester cu huma ta causa na Barcadera su waf pa cu esnan cu ta traha ariba e waf.
Un noticia positivo pa henter Aruba, muy particular pa comercio cu ta comprende e riesgo enorme cu un waf inestable por tin pa nos economia.
Pa sorpresa di ATIA, a tuma nota cu no solamente dos siman pasa pero tambe e siman aki, Douane ta sera porta di waf di Barcadera. A compronde cu Douane ta en espera di mascara protector. E operacion di Douane ariba waf di Barcadera ta den un area cu tin minimo te ningun molester di huma. Ta cuestiona seriamente e motibo tras di e decision pa causa danjo na un proceso crucial den nos pais. Especialmente den e periodo transitorio na unda cu cu gran esfuerso, solucionnan ta ariba mesa y pesey ATIA ta condena fuertemente e accion unilateral di Douane sin previo aviso, sin duna motibo, un proceder cu mester ta inacceptabel na Aruba.
ATIA ta compronde e situacion di molester cu e huma ta causa y a sinta y delibera cu tur partner pa juda jega na un solucion. Trahador tin derecho di traha den un ambiente bon y tur esnan envolvi den e proceso di mehoro a duna di nan parti pa yega eynan lo mas pronto posibel. Tambe a wordo hasi un yamada di parti di promer Minister y di parti di Minister di Economia di Aruba, pa comprension y cooperacion den e fase transitorio aki, pero lamentablemente nos mester constata cu di parti di Douane esaki no ta e caso y lo contrario ta wordo hasi. ATIA ta spera Douane realisa y ta tene na cuenta e consecuencianan cu nan accionan tin pa nos pais Aruba.
