Autoridad a atende seriamente cu un caso di trabounan ilegal cu tabata andando na Bushiri. E casnan cu tabata casnan militar a wordo bendi. Varios hende a cumpra e casnan. Cada ken tin nan estilo cu kier transforma e cas of laga esaki mescos.
E cas 102 parce a wordo cumpra pa un Mericano. E Mericano a dicidi di paga dos persona no local pa desarma e cas pe. Dos dia largo nan a kita Asbesto contra tur regla. Djey a kita tambe Fiber y den e proceso cu e biento a hiba e Fiber na otro banda di caminda den un garage di un Car Rental. E dos trahadonan a cuminsa bira malo pa e Fiber. Esnan mes cu tabata kitando e Asbesto y Fiber no tabata tin proteccion adecua. Solamente un shirt na cara. Ora cu e trahado di car rental a bay atende cu nan riba e molester di e Fiber pa cu nan salud, el a bisa nan ok ta bon.
Pero e ok ta bon ey no a stop nan di sigui traha den forma iresponsabel. Mirando cu e persona a bira mas malo yena cu reaccion na curpa, a bati alarma na Polis y Bombero. Tambe Ambulance a wordo avisa. Na yegada un di esnan cu tabata kita asbest y Fiber a core bay pasobra e ta ilegal. E otro a atende cu autoridad. Bomberonan a manda spuit pa bin muha henter e area pa e Fiber y Asbesto cu por ta riba muraya y den cura. Tambe DTI a atende cu nan.
E paramediconan di Ambulance a cana e proceso di siguridad cu e trahado den e area cu a bira malo. A bañ’e completo cu awa di e bomberonan y djey kita tur paña for di dje prome cu el a subi e ambulance. E paramediconan tambe a proteha nan mes. E officier di Bombero Ferdinand Ponson ta e prome cu a yega na e sitio y cuminsa atende cu ambos trahado. A mustra nan cu esaki no ta forma di traha. Nan a bisa e oficial di Bombero cu mas bien nan a wordo paga pa kita e asbesto y fiber y esey nan a haci. Nan no sa cu tin regla pa e trabounan aki. A keda di busca drechi di e Mericano doño di e cas pa asina e duna cuenta.
