Celebracion di 90 aña di Arubaanse Voetbal Bond (AVB) no bay sin mas. Un aña dedica na su celebracion cu a culmina diaranson anochi den un conmemoracion y presentacion di un documentario cu e conta e historia di futbol na Aruba. Na mes momento a rindi homenahe na 90 futbolista cu a forma parti di e historia aki.
Dicho presentacion a tuma luga den e sala di The Movies na Gloria, caminda e invitadonan a pasa un rato agradabel/ inolvidabel caminda a repasa e bunita historia di Aruba su futbol como tambe tur cu, di un forma of otro, tabata y algun ainda ta parti di e trayectoria di e deporte rey, no solamente riba nos isla pero e deporte mas stima rond mundo, cu ta futbol.
Durante e anochi aki a combersa cu Randolf Lacle, cu ta e actual presidente di AVB, cu a duna un bista riba kico tur tabata parti di e celebracion cu a cuminsa for di e prome evento dia 29 di januari. A para keto riba e echo cu en berdad 90 aña ta hopi y na su luga pa ricibi su celebracion.
Como e ultimo evento di celebracion di nan 90 aña, a presenta un documentario riba e historia di futbol na Aruba. Comision encarga di historia y documentacion di nos futbol, tabata encarga pa busca mas informacion posibel riba e historia y asina hinca esaki den otro pa e futuro generacion.
Durante e anochi aki a rindi homenahe na 90 personahe / futbolista cu tabata of ta ainda parti di e historia aki. Un di e criterionan tabata cu e mester por a forma parti di futbol di Aruba prome cu Status Aparte di nos pais, caminda a bay den tempo y duna e personalidadnan futbolistico aki e honor y aprecio cu AVB tin pa nan. E hungadonan aki den transcurso di decada y cu hopi exito como futbolista den representacion di Aruba na varios nivel ta e gran parti di e historia di nos futbol.
Lacle a indica no solamente e evento riba su mes tabata uno bunita pero e significacion di esaki, ta un satisfaccion grandi di por a duna honor na tur a marca e historia di e 90 aña di AVB. Cu mira pa un magno celebracion di e 100 aña mas dilanti, caminda cu lo sigui acumula historia pa asina por rindi honor na mas futbolista di nos pais.
