Ayera e studiante Gerick Croes a defende su di dos tesis na Universidad di Aruba pa logra e titulo di meester in de rechten Arubaans recht (Master of Laws). El a bira mesora e prome graduado di Facultad di Ley cu a gradua cu dos specialisacion (masterprofiel), cu ta legale rechtspraktijk y fiscaal recht (belastingrecht). “El a bay bon pasobra mi tabata bon prepara. Mi sa di kico mi ta papia y mi por a duna contesta solido tambe durante mi defensa”, asina mr. Gerick Croes a bisa despues di a caba di slaag.
El a conta cu ta un estudio di 5 aña largo y no tabata facil. Siendo un tata di famia, mester a studia banda di e rol ey di mayor. Ta cuestion di pone un meta bo dilanti y no importa con bo ta bay logr’e sino cu bo ta bay logr’e. E ta dedica e diplomanan aki na tur cu a kere den dje y a sosten’e durante su trayecto di estudio.
Gerick Croes ta un studiante di e facultad di ley di Universidad di Aruba y ayera a bira e prome studiante pa termina e estudio di ley cu e profiel fiscal. Recientemente Universidad di Aruba a cuminsa cu un profiel specificamente riba impuesto, cu ta inclui diferente tareanan relaciona cu belasting.
Luenne Gomez-Pieters, docente di e facultad di derecho fiscal a splica cu e estudio ta encera tareanan amplio riba tereno di inkomstenbelasting, winstbelasting, internationaal belastingrecht, leynan di belasting di Corsou, islanan BES, pues ta haya un educacion amplio riba tereno fiscal.
E titulo di e tesis tabata “De verenigbaarheid van het gebruik van onder dwang verkregen informatie onder een informatieplicht voor bestraffingsdoeleinden met het recht om niet mee te hoeven werken aan zelfincriminatie”. E miembronan di e comision di examen tabata mr. dr. Ruth Bonnevalle-Kok, mr. Brian Dake y mr. Luenne Gomez-Pieters. E studiante a defende su tesis den aula di Universidad di Aruba.
E docente di leynan fiscal, mr. Luenne Gomez-Pieters, a splica cu Gerick Croes a defende su tesis bon y cu el a contesta preguntanan skerpi cu el a haya for di e comision den un bon forma. E docente a splica cu e preguntanan no tabata facil y su contestanan ta duna na Hulandes un bon “vertaalslag” na e “praktijk”. E tabata hopi sigur di e investigacion cu el a haci, cu consecuencia cu e comision a dun’e un bon punto, esta un 8.5 pa su tesis.
Luenne Gomez-Pieters a sigura cu tin un scarsedad grandi di profesionalnan riba tereno di derecho fiscal. Pesey mes Universidad di Aruba ta inverti hopi den curiculo unda por prepara profesionalnan den e industria di impuesto. Ta topa cu studiantenan cu ta termina Universidad di Aruba, cu casi semper ta haya trabou mesora, tanto den sector publico como den sector priva.
Na final, mr, Luenne Gomez-Pieters, cu separa di ta docente parttime y director tambe di Departamento di Impuesto, a bisa cu un sonrisa riba su cara cu esaki ta e prome studiante cu ta caba su estudio den ramo di impuesto. “E ta destaca entre otro studiantenan, cu cifranan hopi halto, e tin un drive tambe hopi halto y universidad ta orguyoso di por produci studiantenan bon prepara asina pa drenta nos forsa laboral.”