Ayera a anuncia durante di un reunion publico na Censo, e secuencia di number di e partidonan politico pa eleccion 2021, como tambe asignacion di e colonan, manera prescribi den ley, den un transmision en bibo via livestream.
Tin cu remarca cu durante di e proceso pa asignacion di colo nos conoce cuater partido cu a profila cu diferente tono di e colo blauw, entre nan POR, MAS, UPP y Accion 21.
Sin embargo, a bin un cambio den e proceso aki.
Partido POR a keda cu su colo blauw scur, MAS cu su colo blauw cla. Pero UPP y Accion 21 a conoce un cambio di colo riba e stembiljet. E biaha aki UPP a haya e colo cora y Accion 21 a haya e colo shinishi cla.
Segun director di Censo, Sharin Luydens, esaki ta un proceso normal.
Mester numera e listanan pa por mira riba cua secuencia ta print e lista di e partidonan riba e stembiljet y esey a sosode.
Segun ley e ta sosode via lot. Tambe a apunta e colonan. Por keda sin uza colo of ta uza colo. Esey ta un escogencia cu por haci segun ley.
Luydens a sigui splica cu si acaso tin hopi mas partido cu no por uza colo, e tin cu bay den blanco y preto.
PREPARACIONNAN TA AVANZANDO
Despues di e proceso di secuencia di number y asignacion di colo ta sigui traha riba e logistica. Segun Luydens awo por cuminsa pone e listanan pa manda print e stembiljetnan. Tambe pa cuminsa print e carchinan di votacion pa bay postkantoor. Asina tin hopi trabao ta sigui. Manera prepara tas pa tur e urnanan, prepara e miembronan di urna electoral. Ta hopi trabao den e proximo dianan. Tur esaki tin di haber cu logistica.
Naturalmente no por laga e aspecto di e pandemia afo, mirando cu ainda e t’ey presente.
Hendenan no ta obliga pa bay vota riba e ‘voorsteltijdstip’, cu a duna, sinembargo e ta bin riba e carchi di voto. Tin cos cu a prepara di trempan caba.
Mientras tanto ta preparando e 70 urnanan cu lo uza durante eleccion 2021. Esakinan mester ta registra na Censo.
Manera por ehempel ora bin caya nobo, mester apunta e cayanan aki na un urna y tur cos ta depende tambe di e cantidad di hende cu ta destina na e urna.
Si nos tuma como ehempel e districto di Noord, e cantidad di votado y cayanan nobo a subi drasticamente y esey ta nifica cu mester a habri mas urna. Y habriendo mas urna, ta haci cu tin cu schuif cierto cayanan (nobo) pa e urna nobo, cu ta nifica logicamente cu e persona, bibando na e adres nobo, no lo vota na e mesun urna.
Pa mas detaye lesa matutino TREMPAN.
