Union Europeo a prepara e “black list” di paisnan considera como paraisonan fiscal. E lista a bay di cinco pa diescinco pais. E cinco paisnan cu ya caba ta para ariba, no a mira mehoracion, segun Union Europeo dialuna. Desde aña 2017 e paisnan Samoa, Trinidad & Tobago, Guam y USVirgin Islands ta riba e lista y tur a keda riba e lista.
Tres otro pais tey caba na 2017 riba e black list, a promovenan pa un lista shinishi, pero a pone nan bek riba e black list. E paisnan aki no a cumpli cu acuerdonan haci. Ta trata aki di Barbados, United Arab Emirates y Marshall Islands.
Otro shete pais a move, debi na e mesun motibonan for di e lista shinishi pa e blacklist. Esey ta Aruba, Belize, Bermuda, Fiji, Oman, Vanuatu y Dominica.
Un total di 34 pais ta para riba e lista shinishi den 2019. Y 25 pais cu na prome instante tabata para riba e lista, no tey mas. Union Europeo a evalua 92 pais aña pasa riba nan maneho fiscal.
A rechasa e Black list nobo
Siman pasa 28 estadonan miembro di Union Europeo,unanimamente a rechasa e black list nobo cu paraisonan fiscal. Segun Conseho di Union Europeo, e lista proponi “no a wordo treci dilanti na un manera transparente.”
E Comision Europeo a propone entre otro pa agrega Saudi Arabia na e lista. Lo bay bin paisnan riba e lista, cu ta haci poco pa evita financiamento di organisacionnan terorista.
Hulanda ta uza nan propio lista di 27 pais cu no tin impuesto of cu tin impuestonan abao.
Situacion di Aruba
Cu Aruba a subi e lista preto atrobe no ta bin di sorpresa, pasobra Minister Presidente Evelyn Wever y Minister Xiomara Ruiz ta na altura cu mester a haci cambio den ley y a compromete cu e cambionan lo pasa den Parlamento prome cu dia 31 di december 2018 pa asina cumpli cu e acuerdo haci cu Union Europeo. Sinembargo pa motibo di hopi trabou y otro prioridadnan na Departamento Huridico di Gobierno, a tarda cu e cambio den ley y entrege no mas cu dos siman pasa dia 1 di maart 2019 na Parlamento.
Claro cu e tardansa aki di e departamento concerni awor a hinca Aruba den un situacion masha fastioso mes cu Union Europeo. Directamente e no tin consecuencia pa nos isla, pero si “perdemento di cara” pa mundo. E ta refleha cu Aruba no ta cumpli cu acuerdonan haci pa evita di ta un paraiso fiscal, den cual tin scarsedad di ley pa evita entre otro labamento di placa.
Un di e cambionan sigur cu ta inclui den e ley adapta ta e maneho di Gobierno anterior pa duna incentivo fiscal na companianan estableci na San Nicolas. Otro cambio ta den tipo di negoshinan unda falta transparencia, por ehempel cu Aruba ta bandera avionnan cu de facto nunca a bula pa nos isla of no ta estableci aki mes. Ey mester a adapta leynan pa evita cu un avion ta bula na medio oriente bou bandera di Aruba y di cual ta paga impuesto aki tambe.
Un fecha pa Parlamento atende e cambio den ley no tin ainda.
