Docente di piano, musico y compositor, Kyle Winklaar, hunto cu e banda Hicaru, ta haciendo nan preparacionnan pa asina representa Aruba den e International Bucarest Jazz Festival, cu ta tuma luga tur aña na Romania.
Esaki sigur ta un experiencia unico, cu nan no kier laga bay sin mas. E hoben musico ta conta cu ya caba nan a haci nan audicion y a manda algun video di nan composicionnan cu lo bay toca durante e festival y mand’e pa Europafest, cu ta forma parti di e festival.
E intencion ta simpel. Hicaru ta bay pa gana y demostra no solamente pueblo di Aruba, pero mundo henter cu musica Arubiano ta bibo y activo y cu e musiconan cu ta forma parti di e banda, ta crea temanan innovativo pa e publico den exterior.
Pero pa nan yega asina leu, nan mester di fondo, mirando cu e organisadonan di e festival no ta cubri nada. Pero asina mes e banda ta optimista cu e competencia di continua y kier haci lo posibel pa haya suficiente fondo pa nan por bay representa Aruba na Romania.
E festival lo tuma luga pa dos siman den luna di juli. Hicaru ta consisti di diferente musico di taya Arubiano, manera Serghio Jansen (guitara electrico), Michael Bremo (drums), Christopher Rodulfo (percusion y conga), Jose Croese (baho) y Kyle Winklaar mes riba piano. Por tuma contacto cu nan sea riba nan cuenta di Instagram of Facebook y haya sa con pa contribui cu nan pa asina nan por bay representa Aruba den e festival aki.
