Contrario na informacion eroneo cu a keda publica de medionan di comunicacion recientemente y lo cual ta wordo comenta, Aruba Airlines ta aclaria tur informacion, rumor y datonan cu no ta cuadra cu realidad.
E aerolinea local ta garantisa cu e relacion cu aeropuerto ta uno solido. “Nos tin un bon relacion cu aeropuerto, nos ta mantene un bon comunicacion y un relacion di negoshi saludabel cu AAA”, asina gerencia di Aruba Airlines a indica.
A sigui splica cu tur operacion di e aerolinea na aeropuerto Reina Beatrix ta keda desaroya den margennan di normalidad y ta cumpli cu tur standard global regula pa organisacion y institutonan internacional.
Pa loke ta trata e situacion di personal, e aerolinea aki ta confirma cu no tin ningun personal ilegal cu ta traha cu e aerolinea di ningun nacionalidad. Un 95% di e empleadonan di Aruba Airlines ta Arubiano y den e caso di e demas trahadonan, tur ta cumpli cu e condicionnan rekeri pa traha legalmente riba nos isla.
“Como e aerolinea cu ta representa Aruba, nos prioridad ta pa contrata Arubiano. Solamente den casonan unda cu nos no a haya un persona adecua pa e vacatura, nos a haya nos mes ta contrata un stranhero. Sin embargo, pa nos e ta fundamental cu e grupo aki cu ta representa e 5% di nos staf, ta conta cu tur permiso y documentonan na ordo”, asina gerencia di e aerolinea a expresa.
Gerencia di Aruba Airlines a sigui splica cu e aerolinea ta representa actualmente 125 famia Arubiano, di cual nan ta para pa e interes, bienestar y stabilidad di e famianan aki. Pa es motibo, e compania ta sumamente agradecido cu tur empleadonan y staf, pero tambe cu henter e comunidad cu a sa di duna un tremendo apoyo durante e 6 añanan cu Aruba Airlines ta operando como e aerolinea local di Aruba.
A pesar cu cierto situacion fuera di control di e aerolinea sa presenta cu por afecta e vuelonan cu ta sali regularmente for di nos pais, Aruba Airlines ta sigura cu nan ta sigui traha duro y nan esfuerso ta continuo pa asina garantisa cu tin continuidad y regularidad den tur operacion di e aerolinea.
E representantenan di Aruba Airlines ta splica cu ta trata aki di un compania priva estableci y cu ta opera pa 6 aña caba riba nos isla. “Nos no tin ningun vinculo cu ningun partido politico ni tampoco representantenan di Gobierno. Nos ta traha na bienestar di tur nos clientenan”, asina a indica.
