Na Aruba tin e problematica rond di “het sleutelkind” (mucha- y hobennan cu despues di scol ta keda nan so na cas) y lamentablemente e problema aki a sigui crece cu transcurso di añanan. E presion di trabou di mayornan, divorcio di mayor- of educadornan y un infrastructura cu no ta hacie facil pa e hobennan move y bay riba nan propio forsa cerca amigo y miembronan di famia, a contribui na un crecemento mas grandi di e problema.

E “sleutelkind” ta riba su mes, no tin supervision of guia y door di algun factor social ta bini den contacto cu situacionnan cu nan no por “handle”.Proyectonan y fundacionnan manera YMCA, Traimerdia, a trata di duna un forma di opcion na e hobennan aki pa haci algo positivo, pero cu resultadonan variabel y marginal.Hopi biaha esaki ta mara na gastonan, localidad cu no ta atractivo pa muchanan, e hobennan no ta sinti nan mes na cas, e accionnan tuma ta ad hoc of e guia y e programanan cu ta ofrece ta laga hopi di desea.

Ta e deseo y vision di Gobierno, cu prioridad, pa yega na un solucion adecuado, duradero y efectivo, y cu tin continuidad.

Guia cu huiswerk, , norma- y balornan y e responsabilidadnan social ta forma e base di un programa cu ta funciona bon, mientras cu na mesun momento e hobennan por practica deporte, haci wega, musica y tecnologia.

E combinacion corecto di desaroyo social, desaroyo di talento y placer. Un centro hubenil lo ta un solucion perfecto.

Centro Hubenil

Un centro hubenil ta un espacio unda cu hubentud ta sinti nan mes na cas, unda mucha- y hobennan ta acudi cu hopi placer y unda nan tin e oportunidad pa desaroya nan mes na un forma positivo.  E Centro di Bario ta funciona manera un camber di bario unda hobennan ta siña respeta otro, pa tin respet pa nan mes y pa comunidad, bou guia di personanan cu tin un afinidad grandi pa e grupo di enfoke aki.

Door di crea un ambiente di amistad e muchanan lo profila nan mes cu entusiasmo como embahador di NAN Cas di Bario; e sentido di “nos” lo haci cu e Cas di Bario lo sigui crece pa produci rolemodel positivo, pa e siguiente generacion, den e diferente barionan.

Centro di Bario como localidadnan

Aruba tin mas cu nuebe Centro di Bario, sitionan lanta pa organisacion di actividadnan cu tin un efecto positivo riba e bario of bisindario den cual nan ta localisa.

1) E centronan aki por sirbi como un sitio di encuentro pa e diferente gruponan di enfoke y di edad den e bario;

2)  Dirigi nan mes riba stimula participacion den e comunidad y mehoracion di e posicion social di cada persona;

3) Señala problemanan den e bario na tempo;

4) Brinda apoyo social unda cu ta necesario, y desde prome september 2016

5) Ofrece programanan pa “naschoolse opvang” pa mucha y hobennan;

Cada bario na Aruba tin su mesun caracteristicanan individual y problemanan cu pa cada bario ta hopi diferente y ta varia di un banda dependiendo di e facilidadnan presente manera Cas di Cultura, un club deportivo of di ballet, un futbolista campeon of un personalidad conoci y di otro banda e pobresa, problemanan a-social; vandalismo, criminalidad, desordo, desempleo, aburimento, no tin rutina diario despues di scol, no tin luga pa recrea den forma creativo.

Con ta atende cu e problema y e actividadnan ta diferencia pa bario, pero si ta deseabel un forma di traha uniforme y un “draaiboek” mescos, y hasta mester ta un exigencia pa yega na exito consistente den tur e barionan.

E cooperacion entre e Casnan di Bario

E cooperacion entre e Centronan di Bario no ta solamente importante pa motibonan economico y logistico, pero tambe ta crea un sentido di pertenencia door di cual nan ta bay traha hunto y ta saca probecho di e actividad- y proyectonan exitoso.

Cada Centro di Bario ta traha hunto cu otro centronan y tambe cu e scolnan di e bario, Polis di Bario, fundacionnan, clubnan deportivo, institutonan manera Cas di Cultura, y un persona prominente den e bario.

Mester studia pa cada bario cual ta e problema- y oportunidadnan, unda e problemanan den e bario ta y cual ta e problemanan cu kier mira soluciona.

E programa di actividad ta dirigi riba e aspectonan aki.

Ora cu formula cual ta e problemanan, mester analisa cuanto hoben ta forma parti di e problema, nan edad, cual ta nan interesnan, kendenan ta e lider di e grupo aki. Actividadnan dirigi mester wordo organisa despues den e Centronan di Bario cu mester stimula e hobennan en cuestion pa yega na e Centro di Bario. Esaki por ta musica, practica un deporte, baila of ta activo riba computer.

E actividadnan tin como meta pa trece e hobennan den Centro di Bario y poco-poco gana nan confiansa.

E molester den e barionan di hobennan cu ta keda colga rond lo bira menos of disparce ora cu tin e “naschoolse opvang”

Ora cu hobennan haya e espacio y material pa ta creativo, talentonan positivo ta surgi y door di duna nan guia riba e actividadnan, ta stimulanan pa hunga un rol positivo den nan bario y pafo.

Locatie

A scoge pa Centronan di Bario of clubnan comparabel cu ta situa mey-mey di e bario, cu su localidad ta conoci pa un y tur, pero tambe accesibel di un forma facil.

Contrario na un scol, un club no tin e stigma cu e ta un obligacion y e ambiente di e club ta cuadra hopi mas den loke cu hobennan kier haci den nan tempo liber.

E centro di bario mester tin e siguiente facilidadnan pa e hobennan, cu di e forma aki nan ta yega cu mas placer na e Centro di Bario pa mantene nan mes activo eynan haciendo cosnan cu nan ta gusta, deporte, wega, musica y tecnologia.

    1. Tafeltennis, mesa di biljart, mesa di futbol, y un playstation cu beamer y
    2. Weganan ahedrez, dam, domino, baraja di carta, monopolie
    3. Espacio di oficina pa “huiswerkbegeleiding”.
    4. Un bar unda ta bende algo di bebe y snacks saludabel.
    5. Un area pafo pa deporte manera futbol y basktball.
    6. Un area unda tin sofa, mesa y stoelnan pa haci manera un sala

Orarionan

Mucha- y hobennan mester por haci uzo di e Centro di Bario despues di scol, y p’esey e ora di apertura mester ta 1’or. E colaboradonan di e Centro di Bario mester ta eynan pa 12’or di merdia pa haci tur e preparacionnan. Nan ta guia e muchanan cu ta bini na pia, for di scol pa e Centro di Bario.

E Centro di Bario ta keda habri te 5’or di atardi pa muchanan te cu 13 aña y te 8’or pa muchanan di 13 aña bay ariba. Esaki en conexion cu informacion y charla cu ta bay wordo duna door di fundacion y institucionnan riba diferente tema.

Persona di e Centro di Bario

E personal di un Centro di Bario ta hopi importante, hasta di gran importancia pa un bon resultado final. E colaboradonan mester tin afinidad cu e grupo di enfoke, cu e metanan di un “naschoolse opvang” y cu hopi importancia y interes pa nan trabou pa comunidad. Esey mester ta nan motivacion personal.

Banda di esaki, mester tin un gran confiansa entre otro como colega y tambe haya confiansa principalmente di e hobennan. Pa loke ta norma y balornan, nan mester ta un ehempel pa e hobennan. Nan ta bay funciona como e puntonan di contacto den nan respectivo bario. Tanto pa e hobennan participante como pa nan mayornan y tur otro den e bario.

Tur e ariba menciona ta conta pa e Polisnan di Bario participante como e personanan importante di e bario. Un “sleutelpersoon” den un bario ta un persona conoci denter di e bario pa kende tin un respet grandi, y e porta ta un persona di edad, un hende muhe conoci, un deportista di alto nivel, docente of musico conoci. Den cada bario e “sleutelpersoon” ta hunga un rol importante como “rolemodel” y unda ta acudi pa problemanan social den e bario.

 

Comments

comments