E studiantenan cu a representa Aruba den reunion- y debatenan cu otro studiante di scolnan secundario for di mas cu 80 pais, na e conferencia di Model United Nations na New York, ta raporta cu Aruba a haci un gran diferencia. E grupo ta regresa Aruba diamars merdia cu premio di excelencia pa e delegacion, premio di merito den UNICEF committee y premio di excelencia pa UNTOC. Ta un grupo chikito di studiante di Aruba cu a participa y competi entre como 4000 studiante.
Miles di studiante di scol secundario for di rond mundo a participa den e National High School Model United Nations (NHSMUN) na New York. Ta e competencia di mas grandi, mas diverso y bieu di Model United Nations (MUN) p’e studiante di scol secundario. Studiantenan di 80 pais rond mundo ta bini hunto pa competi representando nan delegacion y pais.
Despues di cinco luna di preparacion fuerte, María Teresa Rodríguez, Emelie Morett, Kevin Smit, Marie-Louise Lopez, Fabiana Montero y Rebecca Yrausquin, compaña p’un team di consehero di facultad cu ta consisti pa Alessio Vargas, Anabela Vivas, Christian Campos y Daniel Matheus a atende NHSMUN. Nan a representa Croacia, cu ta e pais asigna na nan p’e conferencia, den diferente comision, unda a discuti diferente punto di interes global.
Pa prome biaha un delegacion di Aruba a participa n’e NHSMUN. Nan tur a participa den diferente conferencia y debate, unda a representa nan pais Croacia. Aki a debati riba e echo di busca solucion p’e pais. Nan obhetivo tabata lucha contra insiguridad, pa tin siguridad pa mucha y combati analfabetismo (illiteracy) bou di mucha.
E studiantenan ta yega Aruba diamars merdia for di New York, riba un vuelo di Delta Airlines. Mester menciona cu Marie-Louise Lopez ta yiu muhe di lider di partido MAS, actual miembro di Parlamento di Aruba, drs. Marisol Lopez-Tromp.
