A habri siman cu un tremendo anuncio pa e mundo deportivo di Aruba, cu a firma un contract mas beneficioso pa Aruba pa loke ta trata Fundacion Lotto pa Deporte y CBN. A cera siman cu un otro noticia, ora diabierna Gobierno a anuncia inicio di renobacion di Compleho Deportivo Guillermo Prospero Trinidad na Dakota. E trabounan di renobacion lo dura 8 luna.
E stadion ta rico na historia y cu pa hopi hende e tin un luga importante den nan memoria. “Sigur nos no por lubida cu den e stadion aki, na aña 1976, nos a hisa Aruba su Bandera y a canta y toca nos Himno pa prome biaha. Mas cu tur cos a keda subraya con importante e stadion ta pa e ramonan di deporte futbol y atletismo. Pesey mes mi ta aplaudi e atencion cu ta keda duna na su renobacion completo na beneficio di nos deportistanan”, asina miembro di Parlamento di Aruba, drs. Shailiny Tromp-Lee, di e Fraccion di MEP, a duna di conoce.
“Pabien na nos deportista, dirigentenan y fanicadanan. Aki 8 luna boso lo tin un compleho cu ta cumpli cu tur exigencia. Tambe un pabien y gradicimento na Minister Endy Croes cu ta haci e inversion aki posibel y tambe na Canadian Bank Notes (CBN) cu lo aporta financieramente tambe na realisacion di e proyecto aki.”
