Aruba pa loke ta bay aña 2026 tin cuater persona cu a extradita riba peticion di otro paisnan. Mayoria tin di haber cu casonan di droga. Di otro banda a sosode algo cu masha poco sa tuma luga, esta a pidi pa un pais entrega na Aruba un persona cu autoridadnan di Aruba tabata busca.
Den e siman aki cu ta cabando, a aterisa na Aruba un jet procedente di Merca. Esaki tabatin di haber cu dos persona deteni na Aruba, kende a pidi nan extradicion.
Diaranson den oranan di mainta tabatin informacion a drenta cu tin algo pasando na aeropuerto unda cu tin diferente unidad di Polis presente.
Despues di haci algun investigacion a bin compronde cu ta trata di un jet di autoridadnan di Merca cu a bini pa busca dos preso y translada nan pa e pais ey. Ta trata di personanan cu a pidi nan extradicion debi cu nan tin casonan pendiente na Merca.
Un di e presonan ta un Venezolano Italiano cu a detene den luna di januari na su yegada na Aruba. Na aeropuerto mes a detene. E otro ta un Colombiano (Michael Vuelvas) deteni na su yegada na aeropuerto den luna di april, 2026. Tambe pa un caso di droga.
Pero prome cu e duo aki, ya caba Aruba a extradita un persona den luna di juni. E tabata trata di un caso di droga tambe. E tabata envolvi den un structura di narcotrafico internacional, desmantela den luna di augustus di 2025.
Batista Santos, a haci uzo di tur e recursonan posibel aki na Aruba pa evita cu ta mand’e pa Republica Dominicano. A menciona su nomber den un caso cu a desmantela ora cu a confisca 8 paki di cocaina na aeropuerto internacional Las Americas.
Otro nombernan menciona den e caso ey y cu a logra detene na Rep. Dominica mes tabata Julio César Guzmán Torres, Rafael González Núñez, Rafelito García Méndez y Angela Orquídea Féliz Félix. A sconde e droga den un vuelo cu mester a bay Madrid, Spaña.
Spaña
E otro caso tabata di e comerciante Peruano Luis Felipe Barca envolvi den e fraude di e aerolinea Plus Ultra. A detene ora cu el a yega Aruba tambe. Supuestamente el a bin pa biba aki.
Na final di luna di april tur cos a keda cla, pa traslad’e pa Spaña. El a ofrece di bay di forma boluntario, pero autoridadnan di Spaña no a confia esey mucho.
E otro caso tabata ora cu a extradita Adrian Faña pa Aruba for di Rep. Dominicana. E hoben a bay sconde aya despues cu el a bira e sospechoso principal den asesinato di su tanta / mama Luz Divina Faña Paulino na november 2025. Su huicio aki na Aruba lo tuma luga den luna di november awo.
Extradicion pa of for di Aruba no ta algo comun, pero loke si ta hala atencion ta cu e aña’ki autoridadnan a haya nan mes cu cuatro caso di extradicion, cu ta mustra cu e oficina di Interpol tin un bon sistema di cooperacion cu autoridadnan internacional.
Interpol ta manda nomber di personanan pa kende tin ordo di detencion contra nan. Y mesun cos ta sosode si ta un hende busca door di Aruba, Interpol di Aruba ta manda e nomber pa nan coleganan internacional. Asina cu e persona registra cu el a yega p.e. Aruba, e nomber ta pop up y bisa “e tey”. Y esaki a cuater biaha caba den aña 2026.
Prome cu esey por bisa cu aña 2015 tabata un aña unda tabatin varios extradicion pidi, di entre otro cinco persona. Esey a bini despues di e casonan grandi unda tabatin Rubiano envolvi, pa cual Hof a duna conseho positivo.
Banda di esaki tabatin e famoso caso di Alvaro Triana, di aña 1988 ora cu Hof a conseha Gobernador di Aruba pa duna conseho positivo pa extradita e traficante Colombiano aki pa Merca. E tempo ey tratamento di e caso a tuma luga na Postkantoor, fuertemente custodia pa Polis y mariniernan. Mientras cu riba lama tabatin barconan di guera tabata nabega.
A detene Triana riba 13 di mei, 1988, ora cu el a drenta Aruba cu un paspoort falso.
Exradicion
Un peticion di extradicion ta algo cu ta cana su caminda. Manera menciona den e articulo aki, mester traduci henter e peticion y tur su documentonan na Hulandes.
Por bisa cu den 99.9% di e casonan ta bay di acuerdo cu e peticion haci pa extradicion. Ora cu tur documento relaciona cu e peticion ta aden, e ta bay riba lista di Hof pa tratamento. E unico loke Corte ta toets ta si e peticion su documentonan ta cuadra cu loke e tratado di extradicion ta exigi. Hasta si no ta completo, e pais cu ta pidi extradicion, ta haya chens pa completa e dossier. Y si tur cos ta klop, Corte ta duna conseho positivo na Gobernador pa e persona por wordo extradita. Verweer di abogadonan cu e persona ta inocente of cu e tabata “uitgelokt” door di agentenan di DEA, no ta yuda. Paso e ta “vaste rechtspraak” cu tur esey mester wordo treci dilanti den e pais na unda ta wordo extradita. Segun abogadonan, pa bringa un extradicion ta hopi dificil te hasta sin sentido.
