Ex minister di Husticia, Arthur Dowers a wordo acerca pa varios persona, cu ta splik’e cu e situacion den KIA ta bayendo for di man. Tin un minister di husticia cu simplemente no tin e curashi y no tin e conocemento con pa maneha of atende cu e prizon.
Prizon ta un di e retonan di mas grandi cu tin. E ta hopi lucha, e ta duro, pero si mester mustra responsabilidad. No por ta pata pata burachi na momento di kita prizon y nan por kima prizon.
Discusion tabata cu e meneer aki a anuncia prome cu lo bay kim’e. E persona aki mester a bis’e. Asina mes e no a tuma e pasonan necesario pa preveni cu nan ta kima prizon.
Dowers a laga full un sistema di camara eyden y mester ta facil pa observa cu algo lo bay for di man y pa por actua rapidamente y contene e situacion.
Ta lamenta profundamente cu tur e esfuerso a wordo haci, ta wordo daña pasobra no tabata tin e reaccion cu tabata tin den e caso aki.
Na di dos luga, ta hopi tragico pa mira un minister cu a scoge pa laga pedofielnan bay. Awor aki berdaderamente tin di compronde cu e ta bira e ora e defensor di pedofiel. Por a tende cu a laga pedofiel bay, pero esnan cu a horta pan, ta laga nan keda cera. E ora ta cuestiona ki sorto di maneho e tin. No por tin un maneho caminda cu abo ta scoge bo grupo selecta preferi pa bo laga bay.
E no ta funciona asina. Ley ta stipula ken y ken no por bay y abo ta actua contra ley. Segun Dowers, e cos aki simplemente no por sigui di e forma aki. Mester busca un manera pa e minister aki por recapacita. Pa e minister aki cuminsa asumi su responsabilidad pa e luga aki.
E luga aki a wordo hopi daña y a inverti hopi placa den dje pa por tene den un condicion pa por tene e presonan cera. Pero e presonan ta bira sabi dado momento. Mas parti di prizon kima, menos capacidad tin pa cera hende.
E ex minister ta haci un apelacion na e minister aki bin bij. Dowers a menciona na hopi ocasion, cu e minister aki tabata un persona asina entusiasma, cu asina un ansha pa a bisti e bachi di minister, y awo cu e ta sinta eynan, no ta haci loke el a priminti y tampoco ta demostra e interes, ni e sentimento cu mester tin pa hasta esnan cu ta traha riba e luga aki.
E prizon a wordo kima, pero no a mira cu el a bay y haci pregunta. Ta mir’e pata pata burachi si ta cana riba caya. Tin hende ta bisa cu e mag di gosa, pero si mag. Pero ora cu sa cu lo haci tipo di cosnan asina, bo no mag di ta bebiendo, mirando e cosnan cu ta pasando.
E proceso di nombracion di un cabes pa KIA ta uno complica. A laga hopi cos cla p’e. A laga e structura nobo y awo ta mucho mas facil cu tempo cu a bin topa un situacion mas caotico. E por a actua den esey. Ta keda e minister su prerogativa. Dowers ta kere cu si esey no duna resultado, tin cu actua. Pero e minister aki no ta actua riba ningun di e terenonan cu ta importante y tin presion. E tereno mas complica cu ta prizon, no ta mira e minister aki actua.
Pero si a scoge pa laga e pedofielnan bay mas tempran y asina promovi como esun cu ta wordo mira den comunidad aki cu e unico minister di husticia cu a haci un coy bestia asina, esey mester pone awor aki cu bo ta perhudica hende cu a comete un crimen mucho mas leve, cu segun ley, si nan comporta nan mes bon, nan por bringabo den corte si ta necesario.
Dowers ta kere cu no ta bon pa hala atras pa su responsabilidad. Bo tin un responsabilidad, pero carg’e. Pero e prioridad no ta pa laga pedofielnan bay y laga hortadonan di pan keda cera.
Programa di coreccion
KIA no tin un programa di coreccion. Esey ta pone cu door cu no tin programa, e presonan ta hostina.
Segun Dowers, esey ta un reto grandi y esey ta un issue door di hopi aña. A mira y a bay traha cu inspectie cu Gevangeniswezen di Hulanda un dado momento. A traha tambe duro riba cuminsa prepara e programa nan ey. A traha riba verbeter plannen. Y a bay den un bon direccion. A bin cu un overleg cu tur e prizonnan den e region y mira su por logra pa bay riba un sistema caminda cu por mira un progreso den e diferente prizonnan. Lamentablemente e situacion a cambia ora cu e director e tempo ey a baha bay den politica. No sa si e ta director ainda, pero ta bon pa e minister duna claridad riba esey.
Ora cu ela by, por a mira e rapportnan cu a bin despues di esey a mustra cu tur e trabao cu a haci bao di e binimento di e minister nobo, a stagna.
A traha hopi hunto, hopi envolvi cu a crea un situacion unda cu ta bay paso pa paso dilanti.
E prizon aki cu pa hopi aña a keda haya e sentencia negativo di CPT y a cumisna pone e pasonan pa bay den bon direccion.
E reorganisatieplan tabata completamente cla. Tabata tin tambe tur e posicionnan huridico nobo, tur salario nobo cu a keda cla, etc. Ta straña Dowers, cu un aña y mey despues, cu a laga tur cos cla, ningun di e accionnan aki e minister no a worry cun’e y ningun hende ta worry tampoco.
Tempo cu Dowers tabata minister, tabata tin sindicato cu tabata grita manera alma malo tur mainda, unda cu na radio nan ta grita cu cos ta malo y cos no tabata malo. A traha riba tur cos, prepara laga nan cla pa e siguiente mandatario. Y awor cu tur cos ta cla, y awo sindicatonan cu antes tabata grita cu cos ta malo no ta malo mas. Cosnan cu a pidi y pa duna e trahadonan mas derecho, tampoco no ta importante mas.
No mester haci ningun plan di reorganisacion mas, tira tur cos afo numa, segun Dowers. Y bay over na sigui haci loke e ta haci. Pero esaki no ta bon pa e prizon, ni pa e trahado, y tampoco pa e preso. Sindicato ta keto keto. Despues ta mira cu hopi di e cosnan cu a pasa den pasado, door di e sindicatonan aki, ta politica. Nan tabata wordo influencia door di cierto politico. Ta haci politica den e institucion y haci daño na e institucion. E flie ey cu a subi biaha pasa, no lo subi mas.
