Na Hulanda Polis a pone un peticion riba diferente cuenta di Facebook unda ta conseha pa kita e FaceApp. Polis no ta haya e app aki sigur, pasobra e no ta cumpli cu e leynan di privacidad Europeo.
Cu e app gratis aki, e usuarionan por subi un potret di nan mes y mira con nan ta mustra ora cu nan bira bieu. E aplicacion aki ta existi pa algun tempo caba, pero a bira popular desde algun siman atras. Miles di Hulandes, y otro ciudadanonan rond mundo, ta crea un version mas bieu di nan mes cu e filter den e app, pero esaki, segun Polis, no ta consehabel.
Polis ta enfatisa cu e app no solamente ta coy bo foto, pero tambe bo IP-adres y ta ‘safe” datonan di e smartphone y ta hinca cookies den bo celular. P’esey ta miho pa kita e app, por lo menos segun conseho di Polis. Banda di esaki, e aplicacionaki ta viona e ley di privacidad, pero no ta funciona di ki forma.
Fabricantenan di app pafo di Europa oficialmente mester cumpli cu e ley di privacidad europeo, si nan kier ofrece e aplicacion aki na Europa. E fabricantenan di FaceApp ta parce no ta ofrece un metodo pa por ehempel, kita e datonan, cu ta obligatoro. Tampoco ta pidi permiso prome pa recoge cierto datonan.
No ta prome biaha cu FaceApp ta bou di candela. Recientemente un grupo di activista di privacidad a critica e maneho di e app y a conseha consumidonan pa no instala e aplicacion.
Hopi aplicacion gratis ta recoge dato di usuarionan. Nan por gana placa door di permiti esnan cu ta pone propaganda of otro companianan haya acceso na e datonan aki. Den Union Europeo tin reglanan estricto pa comparti informacion, cu ta ofrece e usuarionan e posibilidad pidi nan datonan y laga kita nan.
